ياشيخ عند الله ثمّ عندك ،،، نوره الغامدي

ياشيخ عند الله وعندك دارنا ماهي بدار=ياللي عليك الناس لا ضاقت تشدّ رحالها
لولاك ماشدّت ركايب قوم من كل الديار=حتى تهادت في مرابيعك وظلّ ظلالها
ضاقت بها دنيا فراقك وأظلمت شمس النهار=واليوم ناخت في ديارك وأهتدت من حالها
بعدك شكت قُلّ المطر وتعطّلت كلّ العشار=ياشين ديرة وقت حاجتها تجرّ أذيالها
كِلْ شيّ فيه الخيرة إلا الموت مافيه إختيار=وبنت أبو زيد الهلالي طلّقت رجّالها
في معجم أمثال العرب ضرب المثل يبقى شعار=يوم العرب تطلب حوايجها بضرب أمثالها
الذيب لو ماصابه الرّمّاي يدْوشْه العيار=والنار من شبّابها والخيل من خيّالها
ياشيخ ماجيناك حرّابة وطلّابين ثار=الناس تفدي وطْية أقدامك بروس عيالها
اللي من أوّل ترتجي شوفك على خط إنتظار=جت تعترف لك بالخطا السابق وسُوّ أعمالها
رفّت جناحين الرضا يوم الزّعل حلّق وطار=يا ماأسهل الضيقة بدون أسباب وأدنى ما لها
بعدك ترى ضاقت فجوج الأرض والسّبع البحار=من شرقها لا غربها وجنوبها وشمالها
كانك تبيها مالأخير ،،، أوجز كلامي بإختصار=مافيه مسلم يعرف القبلة ولا صلّى لها