ياشيخ عند الله وعندك دارنا ماهي بدار=ياللي عليك الناس لا ضاقت تشدّ رحالها
لولاك ماشدّت ركايب قوم من كل الديار=حتى تهادت في مرابيعك وظلّ ظلالها
ضاقت بها دنيا فراقك وأظلمت شمس النهار=واليوم ناخت في ديارك وأهتدت من حالها
بعدك شكت قُلّ المطر وتعطّلت كلّ العشار=ياشين ديرة وقت حاجتها تجرّ أذيالها
كِلْ شيّ فيه الخيرة إلا الموت مافيه إختيار=وبنت أبو زيد الهلالي طلّقت رجّالها
في معجم أمثال العرب ضرب المثل يبقى شعار=يوم العرب تطلب حوايجها بضرب أمثالها
الذيب لو ماصابه الرّمّاي يدْوشْه العيار=والنار من شبّابها والخيل من خيّالها
ياشيخ ماجيناك حرّابة وطلّابين ثار=الناس تفدي وطْية أقدامك بروس عيالها
اللي من أوّل ترتجي شوفك على خط إنتظار=جت تعترف لك بالخطا السابق وسُوّ أعمالها
رفّت جناحين الرضا يوم الزّعل حلّق وطار=يا ماأسهل الضيقة بدون أسباب وأدنى ما لها
بعدك ترى ضاقت فجوج الأرض والسّبع البحار=من شرقها لا غربها وجنوبها وشمالها
كانك تبيها مالأخير ،،، أوجز كلامي بإختصار=مافيه مسلم يعرف القبلة ولا صلّى لها

صح لسانك يانوره ياشمس الابداع التى نتشوق لشروقها في كل حين
ابداع في ابداع في ابداع
حقيقة انتي مبدعه ورائعه

صح لسانك نوره
افراط في الجمال
واغراق في الرمزيه

قصيدة رائعه لكنها فقط لاصحاب الذوق الرفيع جدا

لاهنتي

القصيده اكثر من رائعه وتفوق الابداع وهكذا الشعر والا فلا
وان كان بعد كل هذه القصيده ماعرف القبله ابنقيم عليه الحد
لانه يعتبر مرتد وصح لسانك يا روح الشعر على قول الهجير

صح لسانك ..واعتلا شانك
كيف لنا ان نوصف الابداع
(النور من ..نوره .. كشف واجهر الناس)
شكري وتقديري

نعم نعم
هذا هو الشعر كأني أرى لمسه خاصه ونكهه لها جاذبيه
دمتي يا شاعرة الجنوب
تقبلي تحيتي وتقديري
ترانيم

بعض القصايد كنها غصن وتدلى بالثمار
وكن الخفوق المنهك اللي نام تحت ظلالها

نوره الغامدي

صح لسااانك ملايين يا روح الشعر