لو فى الزمن عدل ومساواة ومفاهيم وقيـم=ما يبدع الجوعى لسلة مهمـلات الأغنيـا
صحيح مانى فى عيون الناس مشهور وعلم=لكنى أعرف وش حدود الأذكيـا والأغبيـا
لو شحت الأمطار ما نشره على راعى الغنم=واذا تذوقنا السعـاده مـا نلـوم الأشقيـا
تبلد الأحساس ما جا من فـراغ ولا عـدم=تشوفنا نضحك وحنا وأقشر الحـظ أخويـا
اللى على القمه ترى العالم يشوفونه قـزم=فلا ينسيه اعوجاجه باننـا نـاس أسويـا
واللى على باله فى الصحرا بعد يبنى هـرم=ينوخ اركابه وتفكيره ترى النـاس اذكيـا
رسمت لك ورده ومعها قلب فى وسطه سهم=مفهومها (الدنيا بخير وفيه ناس(ن) اوفيا)
قلبى وهو قلبى لتقديرك خذلنـى وانقسـم=رغم انى اكره لحظة الصده وجرح الكبريـا
دورت للغالين حولى وأثرى أطرد لى وهـم=ليت القلوب السود تاخذ من قلوب الأتقيـا
الدهر صامت ما يجـاوب لا بـلا ولا نعـم=أحيان من زود الحيا وأحيان من قل الحيـا