%%% (( شــبــيــه رومــــا )) %%%

ياصاحبي بعض الرجاوي دخاله=
وبعض الثياب البيض ماهيب ملبوس=
وبعض الحكي دين الكفو يوم قاله=
في لحظةٍ عمياء وفي وقت منحوس=
عيب اللسان اللي خرج من خلاله=
إنّه فتح له (قوس) ماسكّر القوس=
وأنا من اللي يعشقون الجزاله=
لوّنت وقتي من جناحين طاؤوس=
أصبر على أصحاب الخطأ والنذاله=
والطيب فيني للبشر شيّ ملموس=
مثل الشجر لو مات تبقى ظلاله=
وقت الهجير وتنحني تحته الروس=
ترى السعيد اللي يصاحب رياله=
يوم الزمان آشدّ وأمضى من الموس=
والموت لو صاحبت معشر حُثاله=
وأضحيت في دار المساجين محبوس=
واللي أحبّه لو يشوّه جماله=
شبيه روما في زمن مكْسياموس=
يعني ولو يبطي عليّ إتصاله=
ما أعوّضك يا النجم الأخضر بفانوس=
قلبي معه واصل لحدّ الثّماله=
وإلا مع غيره ترى الخط معكوس=
الليل الأسود يستحي من كحاله=
يوم العسل غيران من لذّة البوس=
والله كريم اللي كتب لي وصاله=
ماجيت للموعد بتخطيط مدروس=
ملعون أبو جدّ الفقر والبخاله=
هذي مسيحيّه .. وهذاك هندوس=