ديـــــــوان جنــــــــدب المـــــــالكي

ما في اللاش خير ولا براسه حماسة

قال منهو بدا بالشعر عرف وفراسة =كل فنا عرفه وكل حكمة درسها

والله مشره على راعي الردى والخساسة=مشره الا على قرما علومه طمسها

وضعك اليوم يالهافي درسته دراسة=واكتشفت العلوم الي ضميرك حبسها

ما في اللاش خير ولا براسه حماسة=غرسة(ن) لا عسى الله يرحم الي غرسها

لوقضيت العمر مابين كرسي وماسة=منت مستوعب اعلوم(ن) يضوي قبسها

اعرف الدرة البيضا واعرف النحاسة=واستشف الامور الغامضة واقتبسها

والحب اعرف متى حصده وحزة دياسه=والميادين اعرف احصانها من فرسها

واصحب الي يجي بالراي من مخ راسه=راية الخصم بالميدان ياما نكسها

واتجنب قليل المعرفة والسياسة=مهفي الروح بدروب الخباث ودنسها

واصحب الي ليا جيته لقيت الوناسة =اجودي(ن) لبوس اهل المكارم لبسها

جعل مثله بوقته مايشوف التعاسة=والليالي السعيدة مايطوفه ونسها

قال الذي غنى على كل طاروق

قال الذي غنى على كل طاروق=ويجيد بدع امعوسرات الطروقي

ابا تمثل كان للمستمع ذوق=وابين الي في خفايا خفوقي

مثايل(ن)يطرب لها الحر ويروق=وتسلي الي خالفته الوفوقي

جار الزمان وصار في مقدمي عوق=ودنيا الحتوف اتفننت في عقوقي

بغيت حق وصرت يالربع محقوق=واصبحت بين اهل الحقوق امحقوقي

ومن الخطا صارن في قلبي احروق =ازرا يعالجها طبيب الحروقي

بسباب ناس(ن)تعشق الغش والبوق=وقلوبهم بعد المعاهد تبوقي

ولا السنتهم ما حكت حلو منطوق=ومن النقايص ثوبهم به شقوقي

اقصد عفون(ن) عندها الشر معشوق=عوج الهروج امدنقين العنوقي

اهل العيوب امتابعة كل مطفوق=امشغلة للشر صوت البروقي

امسوية لشر بين البشر سوق=سود الوجيه امعاملة كل سوقي

امفرقة ما بين معتق ومعتوق=خباث الطباع امدورين النشوقي

الي على الفتنة غدا شوقهم شوق=ودهم بشر ايحوق الاجواد حوقي

حتى تشب وتنشب احلوق بحلوق=في ساعة (ن) يبلش بها الي حموقي

هاذا ولولا الخوف من واحد(ن) فوق= الي خلق يالربع كل امخلوقي

لرد لهل البا طل الطاق مطبوق=صباح يوم(ن) ما لشمسه شروقي

ذا قول من قوله موكد وما ثوق= ما هو بقول السيفهان الطفوقي

وانكان عند الناس ضاعت لي احقوق=مولا ي عنده ما تضيع الحقوقي

الي درس حل الطلاسم دراسة

سلام يامن خوته ترفع الراس=سلاما اسمى من سمو الحماسة

واثمن من الياقوت واغلى من الماس=واحلىمن الذوب المصفى بكاسة

والذ حتى من مذاق الا نا ناس= في دوحتن غنا تجيب الوناسة

يلفي وينصى صيرمين وقرناس=امعرب المجنى من اصله وساسه

بن جابر اللي كاسبن كل نوماس=صافي ذهب ماهو بمعدن نحاسة

ابن الذي لا عدو اهل التفراس=عدوه الاول بين ربعه وناسه

من لابتن تعرف وتذكر مع الناس=اهل الوغا واهل الوفا والفراسة

ويا خالد افهم ما كتب فوق الاطراس=معاني اللي بحر الاشعار قاسه

معانين تلبس من الحكمة الباس=جواهرن فيها الحلى والنفاسة

الوالدين اشرب مع برهم كاس=كاس الرضا ومسايستهم سياسة

واحرص على السنة فهي خير نبراس=ومرافق اهل العلم واهل الكياسة

والدين يا خالد هو الاصل والساس=ورجلن بليا دين ينهد اساسه

اجلس مع العلم في كل مجلاس=وافهم دروس العلم والبس لباسه

واحذر هل الغرات والناس الانجاس=اهل العلوم الهابطة والنكاسة

واحذر من الهلاس تباع الادناس=اللي يدوبح للنقايص براسه

وحق الخوي يلزمك ياراعي الباس=واليا حدنه عوج الايام واسه

واللاش لو يملك من الثروة اكياس=ترى علومه كل ابوها طفاسة

واليا بغيت اتحدد احوال الارماس=وتحيط بغموض المسا ر ومجاسه

دورلها اللي يعرف ارموز الاقواس=اللي درس حل الطلاسم دراسة

هذا وانا عندي للاشخاص مقياس=والرجل مايخفى عليه مقاسه

واسلم ودمت وكل معنى من الراس=معاني اللي شيب الوقت راسه

والختم صلى الله على خيرة الناس=اللي على اهل الشرك داس بمداسه

محمد الشافع لنا يوم الاتعاس=لا ضيع الانسان جملة حواسه

ابيات بدون نقاط

ولد مالك امس العصر عدا على المدهال =ودار الهوى واهدى على ام الحلى حله

الا ردد الملهم على اهل الهوىمـــــوال =احالوه لهل الحلم والعلم والمـــــــــــله

احس الالم والهم والسل والســـــــلال =وحلو الملامح ما رحم والهوى عــــــله

واهل المدامع كلما الد للا طــــــــــــلال =ولا اود ولا اهوى سوى ساحر الطـــله

هواحلى الملاح وللحوالك سطوع اهلال =واله السما الواحد عطاه الحلىكـــــله

اهلل مع الاسحار وادعو مع الاصـــــــال =واسال الله الماوى مع مدلع الحـــله

اصور على المسرح حلول اول الاحــــوال=واحل الطلاسم واحكم الامر واحــــله

وامر الامور اهدار الاعمال والامـــــــــا ل =وامرالامور امرار مسلم على مــــله

نشيـد(مجالسي)

الا ياالله يا مجري الهوى =ويا منهو على العرش استوى

ويا عالم بقلبي وش نوى=وياعالم خفايا كل نية

اسالك وانت علام الغيوب=ويا من تعلم اسرار القلوب

الاياالله على عبدك تتوب=وتغفرلي وتمحى كل سية

دعيتك وانته الرب الكريم =تثبتنا على النهج القويم

وتهدينا السراط المستقيم=وتحيينا الحياة اللي رضية

والا يهل الوفا واهل الثبات=تهيض خاطري بالمفردات

طواريقن كما سكر نبات=تحتمها الضروف الواقعية

والايا مرحبا بغلى ضيوف=واكررها ملايين الالوف

وفي جيتكم نصف الصفوف = ويا صباب دير الشاذلية

لفيتونا على راس الشجيع = رفيق الجنب لنسد كل ريع

حليف الجود محمد الصنيع= ابو خالد مفرق كل هية

ليا حل الملاقاء والهواش= على الاخصام سلال وعماش

وللا صحاب هتان ورشاش = من اللي يرفعون المعنوية

ولن جا ذكر خالد بالكلام = مقول الا كريمن من كرام

له التقدير هو الاحترام= كريم اسبال وكفوفه ندية

وابو راكان مزبان الدخيل = له القالات والذكر الجميل

ولن صار المعاند له قبيل = طويل اذراع وعزومه قوية

وماجد مانسيت ولارجب= هل الفزعات اذا الواجب وجب

تجدهم دايمن عند الطلب= تقل عسكر بوضع الجاهزية

وشرفتم على سمن وسمان = وحنا اخوة على طول الزمان

ومن شخصي لكم عهد وضمان =ويالله لاتجيب المكرهية

لفيتم يارجاجيل العزوم =وراحت وانتهت كل العلوم

ولا عد بيننا غير السلوم=كلامن صدق والعهدة علية

ويصحاب المكارم والنبا=ترو حنا عواني واقربا

ومن يشنا لكم جعل ايهبا=ويالله لاتبقي له بقية

ولخواني على شخصي حقوق = ملاذي لاتلاشن الوفوق

ولن نشبت حلوقن في حلوق=بدوكنهم كتيبة عسكرية

واحب اقول في هاذا النشيد=كثير العد قالو مايفيد

ومن قول العوارف نستفيد=ولاتصعب على القاضي قضية

وفي هاذا المقام احب اقول =كلامن تفهمه كل العقول

كلامن ياهل العرف امعقول = على ضوء الحروف الابجدية

منا الايام شيب مفرقي = وبالغبات حول زورقي

وكن القلب ناشه مطرقي = وبا الاعماق عله داخلية

ومن طاوع هوى نفسه ندم= ومن عثرات بقعا ماسلم

ومن بالدين يالربع التزم =فلا يرضى الحياه الفوضوية

وتقوى الله وخوفه خير زاد= ومنهو طاع خلاق العباد

هداه الله لدروب الرشاد= وصارت عيشته عيشه رضيه

وكل الخير وفي الاتباع = وشر الشر شر الابتداع

ودرب ابليس تاليه الضياع= وعوده للحياة الجاهلية

وربي ماخلق عبده همل= ولاكنه مكلف بالعمل

ودين الله على الحق اشتمل = ودين الله خيرن للبريه

ومنهو حاد عن درب الصواب = تعرض للمتاعب والصعاب

ولسواله فلى يلقى جواب = وبين الناس ماله قابليه

وتم القول واختم بالصلاه= على المبعوث نورن للحياه

عدد ماحدثو عنه الرواه= وما هلت من المنشا نشيه