إلى كبيرنا الذي علمنا السحر إلى ((علي)) وكلّ علي .........

مع كل يوم يمضي من عمر الانسان وكل ساعة تمر يزداد المتأمل في أحوال الدنيا بصيرة وحكمه ........
هذا بعض بوح قلم يدندن في عالم الشعر الفسيح فاقبلوها كما جاءت

أثر القصايد ياعلي مالها ذوق = ان كان ماصارت كما شرّد الريم
مثايلٍ ماجابها كل مطفوق=يتعب لها الشاعر بمعنى وتحكيم
أقولها والعين نظراتها فوق = ماحدّها روس الشواهيق والغيم
مانيب راعي نوق ياواسم النوق = النوق مبغي صفرها والمجاهيم
انا اشهد انه في المغاتير لي شوق = لكن ماني تابعٍ جرّة الهيم
يوم الحياه ايامها كنّها سوق = جماعةٍ تقفي والاخرى مقاديم
فيه السليم وفيه من عاقه العوق = وفيه للعاقل رشاده وتعليم
سبحان محصي الكون مخلوق مخلوق=ربّ العباد المنتصر للمظاليم
اللي بفضله حايم الطير مرزوق = يعلم خوافي الصدر من غير تكليم
شمس الحياه اللي لها غرب وشروق = تزيد في فكري عجيب المفاهيم
مابين سابق للمعالي ومسبوق=ومابين مستهتر بكلّ التعاليم
كم ناس تلبس لكن الستر مشقوق = لايخدعك هندامها والمراسيم
مالي بوجهٍ من حيا الناس محلوق = يتعب ولا يلقى مع الناس تكريم
ياما تغصّ قلوب وعيون وحلوق = من ثقل ناسٍ ماتجيب المغانيم
وانا لك الله منطقي خير منطوق = مادام من يتسمّعونه شغاميم
اسمع كلامٍ كنـّه رعود وبروق = قولٍ يهزّ قلوب ماهو ترانيم
وقتٍ مضى مافيه يمدي وملحوق = هذاك عدّا والعوض في المقاديم
والوقت لوطعنا الملذات مسروق = لكنـّها الدنيا مغرّه وتوهيم
كم عزم بحبال الخيالات مشنوق = نفنى ويفنى في ندامه وتغريم
بعض الكلام يقال والحلق مخنوق = والصدق ماهو للوجيه المعاتيم
كنت احسب الدنيا محبـّه ومعشوق= أثر الزمن كلـّه زلازل وترميم
لكن سيف الصبر في العمر فاروق = مابين عسرٍ مايوصّف وتنعيم

الله علي عليك أخي العزيز
لافض فوك ولله درك
قصيده في غاية الجمال والروعه
تقبل مروري وسلامي
ولك مني خالص الود
آمير الكونــ

صح لسانك ملايين ياشاعر انا اشهد انها معلقة تكتب بماء الذهب

الله الله وصح لسانك لين ترضى ياشيخ احمد وانا اشهد
ان هذه القصيده تعتبر معلقه وتستحق ان تكتب بماء الذهب

عشت يا شاعر تعلاّ فوق هامات القصايد=وامتطى صهوة خيول الشعر واجتاز الحدود

احمد مطر
شاعر الحكمه والابيات المتلألأه
صح لسانك وعلى شانك ابيات صيغت بمهاره واتقان
ماشاء الله تبارك الله زادك الله من فضله
تقبل مروري ولك الشكر والتقدير

صح لسانك وعلا شانك .....

والله يعطيك العافيه