رحلتي الى تركيا شتآء 2008 / صور+ فيديو الجزء الثالث

صبآح و مسآء الخير لكل من شرفني ونور يومي بطلته


هنا بيكون تقرير رحلتي في تركيا يوم العيد وكان أكثر
الأيام الممتعة لنا هناك أخليكم مع التعليقات والصور
ومثل ماقلت من قبل اللي مايحب يقرأ يارب تعجبه الصور
واللي فاته الجزئين الاول والثاني وحب يطلع عليهم

{ الجزء الأول } . . { الجزء الثاني }

صحيت الصباح ونزلت افطر انا وبابا في الفندق وكانت اول مرة انزل البوفيه
وكل يوم كنت انوي انزل اصور البوفيه بدري لكن اتكاسل واكمل نوم

هذي اطلالة المكان اللي اخترته لاجل نفطر فيه على الميدان :



كان البوفيه مليان ماقدرت اصور واكتفيت اني اخذ فطوري
ورحت جلست على الطاولة انا والبابا ربي يحفظه وهذا فطورنا
وانا اطالع فيه واقول بنفسي الحين العالم تذبح وتسلخ وتحمر
وتشوي وتقلقل وحنا هنا ناكل كذا بس حمدت ربي اني لقيت
ما آكله غيرنا مو لاقي شي ..

اللي ذقته الـ 3 حبات زيتون وقطعة حلاوة طحينية والطماطمة







خلصنا الفطور طلعت الغرفة لقيت الماما واخواتي صحيوا عايدنا بعضنا

ونزلت قلت بأتمشى شوي الى مايجي موعد خروجنا من الفندق
اول مانزلت رحت وسط الميدان والحمام يتكاثر فيه بشكل كبير صحيح
اقرف واخاف منه بس شفته اليف من بعيد صورت كم صوره



وهذا ملف فيديو للي يحب يشوفه يمين الفارة وحفظ بإسم :



الحـجم : 5.8 م.ب
الامتداد : rm

هذا شارع الاستقلال الصباح وكان خالي تقريبا على غير العادة .

وعلى حسب ماشفنا وقالوا لنا ان العيد عندهم هادي جدا لان
الناس تقضيه مع اهلها وماتطلع كثير فيه خصوصا اول يوم العيد.



مشيت شوي فيه محلات تبيع الورد شكلها مرة حلو وبعضهم طيبين
سمحوا لي اصور وبعضهم اشكالهم ما تأهل حتى اتكلم وياهم




هالصورة طلبوني اياها بحجم كبير كخلفية لسطح المكتب اللي يبيها
يضغط على الصورة :



بعدين مشيت واخذت طريق رجعتي لفندق مرمرة اخذت اغراضي ونزلت
سوينا شيك أوت من الفندق وجلسوا موظفات الريسبشن يعلمونا كلمة

عيدكم مبارك بالتركي : بايرَمينيز قوتلو أولصن Bayraminiz Kutlu Olsun
لكن الكلمة حسيناها طويلة كثير فقالت المرشدة كفاية تقولوا لهم
Bayraminiz بايرَمينيز وقدموا لنا شوكليت كهدية للعيد

وصل الباص ونقلنا الى فندق سنترال بالاس 4* لكنه افخم
من مرمرة وان شاءالله بانزل صوره لكم في الجزء الرابع والأخير

وصلت بنت خالي وتحركنا كلنا وتوجهنا الى منطقة سألنا عنها لاننا شفناها
في مسلسل سنوات الضياع يوم طلعوا لميس و يحيي بالتلفريك وجلسوا في
مقهى شكله حلو كثير اعجبنا وعلى اننا زرنا اسطنبول 9 مرات من قبل لكن
ماقد شفنا تلفريك فيها وعرفنا ان المنطقة تسمى ايوب نسبة للصحابي
الجليل ابو ايوب الانصاري ويكثر بها المسلمون واعلى الجبل يوجد بها المقهى
يسمى بيرلوتي نسبة الى الكاتب الفرنسي الذي كان يقضي يومه فيه لكتابة
مؤلفاته وعرفت اسم المقهى من موضوع لأخوي يمون12 في منتدى العرب المسافرون

المنطقة بجد حلوة وهادية ورخيصة وبها مسجد باسم الصحابي ابو ايوب الانصاري .

هذي صورة لنا بالطريق :



ومن هنا شوفوا مكان العلم الأحمر اللي بالصورة المكان اللي بنطلع له
بالتلفريك وصولا لمقهى بيرلوتي والمسجد اللي تحت على اليسار هذا
مسجد ايوب الانصاري :



وصلنا المنطقة من جهة المسجد وهذي صورته :



وهذي نافورة في ساحة المسجد الامامية :



المنطقة طلعت فيها مقابر مسلمين ولان اليوم العيد الكل يجي يزور امواته
واستغفرالله طلع التلفريك يمر من فوق المقابر وحتى المقهى فوق يمين
ويسار كله مقابر بصراحة ماعرفنا الحكم يجوز او ما يجوز .

رحمنا الله واموات المسلمين تحت الارض وفوق الارض ويوم العرض .

نفس منطقة ايوب فيها مقاهي ومطاعم ومحلات صغيرة لبيع الحلويات
والاشرطة الدينية والملابس واسعارها رخيصة جدا



من جهة المسجد و حتى نوصل لمنطقة التلفريك بيكون المشوار طويل تقريبا
مسافة كيلو ويمكن اكثر لكن لانك برحلة ماتحس فيه لكن اذا معاك كبار
رايحين يتعبوا كثير ولان صعب على الماما والبابا يمشون كل هالمسافة
جلسوا ينتظرونا في المقهى مع زوج بنت خالي واحنا اخذنا الصغار ورحنا
لمنطقة التلفريك .

بالطريق لقينا مكان يذبحون فيه خرفان العيد وكان شكل الخرفان غريب
اعجبني قمت صورته طبعا مدري وش بلاهم كلهم منسدحين وهاديين




لكن اللي لفت انتباهنا وضحكنا انهم مربطين خرفانهم بايشاربات وفيونكات






انا كنت احسب خرفانهم معطينها منوم ونايمة لكن يوم جيت اصور صحى لي واحد




كملنا طريقنا وطلعنا على الطريق الرئيسي وشفنا قدامنا الجبل اللي بنطلعه
الصورة صورتها بنت خالي ربي يسعدها انا راح عن بالي اصورها



وصلنا عند التلفريك حجزنا للدخول وسعر التذكرة ليرة واربعين = 3.5 ريال سعودي
والاطفال الصغار دون 6 سنوات مجاني وسعر النزول نفس الشيء يعني 7 ريال
التذكرة كاملة للشخص .



عيب التلفريك اللي فيه اثنين بس يطلعون وينزلون وكل تلفريك ياخذ
10 اشخاص وقفنا ننتظر التلفريك يوصل واخذتنا الحمدلله عربة وحدة كلنا




هذي صورة واحنا بالتلفريك نمر فوق طريق السيارات شوي وماتاخذ الرحلة
في التلفريك اكثر من دقيقتين او 3 اعتقد مرة سريع طبعا مو واضحة عشان
زجاج التلفريك



وصلنا وجلسنا نصور كم صورة من فوق وهذي صورة لممر يطلعك لمقهى بيرلوتي



وهذي صورة من نفس المكان لمنطقة القرن الذهبي من اعلى
اللي يطل عليها المقهى والمكان بجد قمة في الروعــة


صورت كم صورة جمعتهم لكم في صورة بانورامية للمكان يارب تعجبكم
ولو تلاحظون المسجد اللي على الجبل الثاني اسفله نفس الشي مقابر



وهذي صورة ثانية :



وهذا الجسر اللي مرينا فوقه و صورت منه قبل وشفتوا منه منطقة التلفريك والمسجد



هذي صورة للمقابر اللي بجنبنا انا ماصورت صور مقربة فاخذت الصورة من اختي



وهذي صورة ثانية للمقابر اسفل الجبل اللي طلعنا من تصوير بنت خالي



للاسف استعجلوا اخواتي وماطلعنا المقهى عشان ما نتأخر وهذا ملف
فيديو للي يحب يشوف المنطقة صغرته عشانكم والاصوات اللي تسمعونها
اذان العصر ولان المساجد متعدده فتداخلت الاصوات على بعض .

يمين الفارة وحفظ باسم:



الحجــم : 3.8 . م.ب
الامتداد : rm

رحنا ناخذ تذاكر من ماكينة ندخل فيها الفلوس وندخل العدد وتطلع لنا
وهذي الصورة صورتها قبل يوصلنا التلفريك :



واحنا راجعين لمسجد ايوب عند الماما والبابا صورت هالصورة
على يسارنا البحر والتلفريك خلفنا



اول ماوصلنا منطقة ايوب مرة ثانية شفنا عربة يبيعون عليها ابو فروة وغزل البنات
وقفوا الصغار يشترون منهم فصورت كالعاده




ورجعنا عند النافورة من جديد



وانا واقفة اصور لفتت انتباهي هالشجرة والرجال واقف عندها
سبحان الله كانها مظلة طبعا ماقصرت صورتها



وطلعنا من المنطقة وركبنا الباص وقررنا نروح برحلة بحرية في يخت خاص
ولكن المنطقة كانت بعيده وخفنا يجي علينا المغرب فاقترحت علينا المرشده
اننا ناخذ الرحلة في السفينة كتجربة جديدة لنا وقلنا نجربها مو خسرانين
شيء ورحنا لميناء السفن مقابل مسجد السلطان احمد نسيت اسم الميناء
سعر التذكرة نفس الشي ليرة واربعين = 3.5 ريال سعودي ذهاب ومثلها اياب

.

تحركنا الى منطقة الاسكودار في الجزء الاسيوي
واخذت كم صورة وهذي اول ماتحركنا من الميناء الاوروبي
والمسجد اللي تشوفونه هو جامع السلطان أحمد



وهذي صورة ثانية



وهنا المباني اللي تشوفونها مرتفعة فندق : ( الرتز كارلتون - جالان انتركونتننتال - مرمرة )



هذا قصر دولمه بهجة ( قصر السلطان عبدالمجيد )



هذي الصورة عند وصولنا للميناء اسكودار الآسيوي



وقبل اوصل اقلقوني 7 بنات اتراك الا يبون يسولفون وياي ولا يتكلمون
انجليزي ماغير عرفوني باسمائهم وطفشوني ولا خلوني اعرف اصور
واخر شي 3 منهم قالوا صورينا فصورتهم



نزلنا وكان الجو بآآآآآرد جدا والهواء ماخلانا نفكر لانتمشى ولا شي بس
سألنا وين طريق الرجعة ومشينا الى المركب الثاني حتى نرجع متنا برد
وفي طريقنا شفت بياعين الورود قمت صورتهم




وهذولي اللي يلمعون الاحذية بكل مكان تلاقيهم



وهذا صورة لمركب مثل اللي بنركبه



ولان الجو بارد كلهم جلسوا داخل انا لبست جوانتياتي وطلعت اصور
شوي لحقوني اخواتي والصغار مستانسين على طيور النورس وهذي
صورة لنا اول ماتحركنا ويظهر الجسر المعلق الجديد



هنا الجسير يبين اوضح



الصغار ولد اختي و اولاد بنت خالي جلسوا يرمون كسرات خبز للنوارس
فكان شكل النوارس وصوتها مرة حلو مرافقنا طول الطريق من اسيا الى اوروبا

وطبعا لان المسألة صارت استغلال فكان يبيعهم البوفيه بالسفينة
1 خبز الصامولي الواحدة بـ ليرة = 2.5 ريال سعودي وهم ماغير طالعين
نازلين يشترون منه وهذا ملف فيديو فكرني بعدنان و لينا و نورس لينا تكي

يمين الفارة وحفظ باسم

الحجــم : 3.81 م.ب
الامتداد : rm

هذا الجزء الآسيوي اللي تركناه



وهذي صورة للميناء اللي بنوصله في اوروبا حبيتها كثير
وكنت اصور لوحدي ولكن جاتني المرشدة تسولف وياي
وماقدرت اصور كثير .. والصورة بحجمها الأكبر احلى
اضغطوا على الصورة وشوفوها



وهذي صورة ثانية للحظات الاخيرة للغروب



وهذي بعد



وهنا قبل وصولنا مرينا من تحت الجسر لكن المرشدة حكيها كثير
وجالسة توصف لي المكان فما صورته الا بعد ما مرينا من عنده



وهذي صورة للمقاهي اللي تحت الجسر تقول كثير حلوة
ولكن كنا بردنا وتعبنا وذبحنا الجوع فما رحناها لهم



وهذي المنطقة بعد الجسر عند الميناء



اهم شي في الرحلة هذي ان الصغار انبسطوا كثير وتحمسوا
لها مرة ثانية لكن ربي ما اراد ورجعنا ركبنا البحر من جديد


واول ماوصلنا انتظرنا الباص يوصلنا وقررنا نروح نآكل مدري هو غداء او عشاء
في مطعم Gelik من اشهر المطاعم التركية وكل مرة نزور اسطنبول لازم نروحه



و اول مادخلنا المطعم شفنا الممثل الكويتي غانم الصالح لكن ماطرى لي اصور


هذي صورة لقسم الوجبات السريعة للمطعم



وهذي بعض الصور للمطعم من داخل



وهذا المكان مقابل لدورات المياه وانتم بكرامة



وهذي صورة للخرفان المشوية اللي يشتهر فيها هالمطعم
لكن للاسف ماصورتها وهم يشوونها ويحمرونها على الفحم



وهذي صورة للمكان اللي جلسنا فيه



اعجبني شكل الباب كثير والديكور



واحنا جالسين جاتني بنوتة تركية ياعمري عليها تهبل ربي يحميها

ومشتغربة اشكالنا قمت اخذتها وحطيتها على طاولتنا وكشفت لها
وجهي جلست تستعبط علي وتلعب يندونها اهلها مو راضية تروح
قمت طبعا صورتها ماقصرت بس خفت عليها من الحسد .
ربي يحميها عبطها ماشفته على طفلة بالقوة اخذوها اهلها
سالت عن اسمها قالوا لي عاليه صحيح كبير عليها بس محليته



وهذا منكيرها توريني اياه وهي تلعب بحواجبها وفمها وتضحك بخبث




طلبنا طلباتنا وجابوا لنا الخبز وعليه حبات فصفص



سلطة اللبن بالخيار مرة يمي



ملفوف محشي لاتدققون بالشكل الطعم يم يمي



وهذا الرز يطبخونه بطريقة خاصة للمطعم ويشتهر فيه مع الفطر والنعناع
انا مو كثير حبيته لكنه لذيذ



وهذي الشاورما بعد يشتهرون فيها بتركيا بشكل عام وبالمطعم
ولكن الصورة من فرع ثاني لهم ومعاه ا لآيرآن ( اللبن المملح ) التركي



وهذا كوكتيل صحن مقبلاتي علي بالعافية



هذا الخروف المشوي تعرفون الدنيا عيد وبالقوة نبغى نحس فيه



وهذي الكفتة طلبي انا



يعيب عليهم انهم مايقدمون الأكل بطريقة حلوة لكن المهم الطعم يمي

وهذي القهوة التركية



وهذا الحلو تبع خيتو ( بودينغ رايس ) مهلبية رز بالفرن



وهذا اشهر حلو عندهم وهو الكنافة ومنها بالفستق والجبنة
بس نصيحة اطلبوها بدون قطر ( شيرة ) نهائي لانهم لابد
مايصبون فوقها وبتكون حالية موت



وهذي صورة كنافتي حاولت اصورها قبل اكلها بجد مشتهيتها موت الحين



حاسبنا وطلعنا من المطعم كانت فاتورتنا 220 ليرة = 530 تقريبا سعودي

وطلعنا من المطعم ولانه بعيد شوي عن فندقنا وياخذ تقريبا نصف ساعه
حتى وصلنا لمنطقة تقسيم كل رجع فندقه وجلسنا ارتحنا وبعدين نزلنا
انا واخواتي تمشينا شوي في شارع الاستقلال كالعادة ورجعنا كملنا
سهرتنا وكنا ناويين نطلع ثاني يوم في رحلة لكن الماما تعب ظهرها
فقررنا نجلس بالبيت لاجل ترتاح وطلعنا احنا البنات تسوقنا ورجعنا

المهم انا طولتها وهي قصيرة ان شاءالله ما اكون ثقلت عليكم
واشوفكم في الجزء الأخير للرحلة ان شاءالله قريب

.. تقبلوآ مني اعطر و أعذب تحية ..

المزيد...

مكنت اتخيل تركيا بهلمناظر

يسلموووووووو

يعطيك العافيه

رحله حلووه عقبالنااا