جرح غالى معك هروج تهول 0ويش قصة البقشة وعطر أبو حنش وسروال خط البلدة ؟

هلا وغلا كل الشكر لكم وابشروا نعلمكم عن فرقنا
رجل يماني كان يدور القرا معه صندوق يتحمله فوق راسه
وبقشه في ضهره
كان يحمل فيها حلويات وبساكيت
وعطور مثل ابو حنش وكان يجي بالكحل الحجر للنسوان وصبغات ومكر للخياطه وابر ومقص اضافر ومسافع

ومناديل وبسكوت مداح وعطور والشنبو الاحمر والحمره الخضراء
ومنضفات للنسوان وفقس وتنتريون
وشحم النمر
وكان يجي في المناسبات كثيرا وكن النسوان يفرحن لاجاء
لانهن ماهو زي اليوم كان ممنوع الحرمه تندر السوق
وكان لمن يجي يقول ب اعلى الصوت ( فرق فرق فرقنا)(فرق فرق فرقنا ) ويمشي ويخرجون يتلقونه الحريم والجهله
ويفرحون لانه كان يجي بكل مايحتاجونه
وكانو اهل القرا يعزمونه للعشاء والغداء ماقالو هذا يماني وش نبغي به كان كرام مع اللي من الديره والاجنبي
وكان ينام غالبا في المساجد
ويواصل سيره من قريه الى قريه
وفيه شاعر زمان اسمه جار الله لانه كان يحب وحده وماكان يقدر يمر بيتهم يمارونه ويمكن يذبحونه
عود يقول :::
يقول جار الله هنّاّ الله لفرقنا
يمر في كل بيتن مايمارووونه
لان البائع اليمني كانو يخرجون النسوان ويشترون معه ويكاسرونه بينما جار الله مسكين جعل الله بي عنه
مايقدر يشوف حبيبته
..
هذه نبذه مختصره عن فرقنا واعذروني ع القصور
هذا اللي اعرفه انا عن فرقنا وان كان احد عنده اضافه يدلي بدلوه
واتمنى عند النقل تكتب الحقوق لمنتدى رباع : جرح غالي

دليل الوعد
وجرح غالي
ابدعتما
والله تذكرت كل هذه الاشياء
وكذا تذكرت
فرقنا اللي كان يجيب هذه الاشياء لان الناس ماكان عندهم فرغة يروحون السوق وياتون بالصباغ والغزل(صوف الغنم)
يقول جار الله ان الله لفرقنا
التحية والتقدير لكل من في هذا القسم ولكل الاخوة والاخوات في الاكاديمية اللي خلونا نتذكر الماضي
ممنون لكم جميعا وبصراحة اهنيئكم على روح الالفة والطيبة في هذا القسم الجذاب والممتع وارجوكم تقبلوني صديقا فوق العادة لكم جميعا