البرتقاله .... البرتقاله

...........البرتقاله............

غركم مظهر جمال البرتقاله.......ما عرفتوا وش حسبها من نسبها

لو بها حشمة وتخضع للعدالة.....كان بين الناس ما هزت ذنبهـا

هافي أصله وعمـه وآخواله......همها ترقص وتلهى في طربها

الجهالة من يناظر هالجهالة......ما يميز وش محرم من رجبهـا

واحسايف كيف يخدعكم جماله......والبضاعة كـل شّـرايٍ قلبهـا

البنات الحور في نجد الأصالة......الحيا والستر من ربـي وهبهـا

الفخر بالدين ما هو بالخمالة........والنحاس نحاس يفرق عن ذهبها

شف بالي واحـدٍ مبغـا بداله......... عرضها مصيون ما زولٍ سلبها

ما مشت عريا وداجت بالبقاله........العقل والدين هو غايـة طلبهـا

والله اني كلما شفـت الرذاله..........كن جوفي يصهره حامي لهبهـا

حالة صرنا بها ما هيب حاله........العقايب لا تجينـا مـن سببهـا

النمل لا طار ينذر في زواله.........كم ديار منعمـه ربـي نكبهـا

مثل جنة عاد يوم الريح جاله........صب ربك فوقهم حامي غضبها

العرب غنت على يالال لاله.........والقدس تبكي وتنخى في عربها

صارت إسرائيل تقتل بالعماله.........الشجاع من العرب منهو شجبها

والعراق اليوم وضعـه يّرثاله..........سلط الله بوش دمرها و نهبهـا

يالله احفظ دارنا مهد الرساله...........من أمور تشعل النار بحطبهـا