 |
 |
 |
|
|
|
|
|
|
|
#1
26/09/2011, 11:25 PM
|
|||||||||||
|
|||||||||||
صباحكم/ مساكم خير ورضى من الرحمن
كيفكم جميعا ...وكل عام وانتم بخير ..وتقبل الله طاعتكم والمعذره على الانقطاااع الخارج عن ارادتنا لكننا الحمد لله عدنا لكم والعود احمد ماشاء الله تبارك الله مدهرين الله يعطيكم العافيه يارب .. بما اننا باقي في توالي ايام عيد .. فبهب لكم يوم من ايام اعيادنا ... اذا كنت انا وبنات عمي لاني مامعي خوات وكنا ساكنين معن في بيت واحد المهم.. اول شي كنا ننزل السوق مع بويه قبل العيد بيوم او يومين ..ومن محل في محل وبويه صايم وصياحه علينا وحن اغراضنا كثيره لازم نشري ملابس داخليه قطنيه لااااازم قطن (أمي تكون قد صاحت علينا تقول لا تآخذون الا قطن والله لو خذتوا نايلو ان تبكون )وبعد الملابس الداخليه الفستان وكان بنا فرحه ما يعلم بها الا الله اذا جاء دور الفستان تبدا شدوقنا تتوسع من الفرحه ونعدي عند الفستان الي لمعته تبصرها من بالقرن وانت في النماص..لازم يكون فسفوري او وردي ولا زم يكون نفاااااااااش مررررررررره لأنه بتصير مسابقه بعد شويه بحكيها لكم .. المهم نغلق من الفساتين حشا ماهي فساتين حرام ان كنها شرعه مو فستان ..المهم ونروح على محل الهيلاهبات ونشتري هيلاهبات لازم ابييييض اسمنا مرتبات ..وبعدها نروح للحذايين وانتوا بكرامه وتكون سوداااء مهما كان لون اللبس مدري ليش !! المهم ونرجع البيت ونوري امي وبنا فرحه خولف ما عاد الا او نتشقق ..واذا عاد بكره العيد كل وحده منا تختار طاقه من طيق الغرفه او نستعين بطاقة غرفة ومي وكل وحده تهب ثوبها في معلاق وتعلقه بالطاقه وتندر الهيلاهب من تحت الفسان وتهب الجزمه تحت الهيلاهب يعني كن احد لابسه بس انه معلق ..ونسير نرقد من 9 او 9 ونص عشان يجي بكره بسرعه ..كنت اقول لخواتي خلونا نرقد ذلحين عشان يجي بكره بسرعه..ونرقد وحزة يأذن نقوم مثل الجن والعفاريت ونتروش ونسشور شعورنا سشوار مالكم به حرام يا قعد الشعر بلا انه ارحم غير نهبها بهوا الاستشوار او تعاد شعورنا عبا الخيام المهم وبعد ما نتسشور كانت شعورنا طويله وامي تخاف علينا فتحلف ان تضفرها لنا وتعالوا او ترون البكاء والصياح ودنا نتدلع بشعورنا وامي تعيي تقول او تضفرها .. وتضفرنا امي وعيوننا ما تدمع من معط امي ومن حسرة انها ضفرتنا ..المهم يصلي ابويه ويرجع من الصلاه فنرتز حزة نسمع الباب نصتف بالدرج لابسين الفساتين وشعورنا مضفوره ولا بسين الحذايين ما تلق ووجيهنا نااااشفه بس ان امي اوقات تتذكر فتلطخنا بالفازلين حرام انه ينلوي ثمي يعاد في زغدي من شدة ماهي ما تدعك ويهي بالفازلين ..المهم ويدخل ابويه ونسلم عليه ونآخذ عيدياتنا ..ونفطر ام نروح بالطيق نشوف منداهي تي او تطلع من بنات الحاره او نسير نعايد معها ..ويطلعون بنات الحاره واذا وصلوا عندنا هبنا لهم حلاوه بقرة تقليد زيد ماهي من الحلوه وحلاوه ثانيه كان يجيبها ابويه قااااسيه كانت امي تقول مذاهي الحلاوه تي جبت والله لو حذفت بها يهودي ان يسلم ..المهم ونلحق بنات الجيران ونكمل معهم نلف على الحاره ونغتث من الحلاوه تيه ونملابها شناط معنا كان معي شنطه ذهبيه تللللللللللللمع وصغيره قعدت اعيد بها ارهي 5 سنين وهي معي ذا الشنطه .. ونرجع البيت انا واخواتي ونشوف كل وحده كم جالها عيديه وكم معها حبة حلاوه وفي الاخير نتضارب ونبكي ليش ان تياك معها لعون وانا شويه وتشلها امي كلها وترتاح من الصياح ..فنبكي وكل وحده تلعن الثانيه لأنها السبب.. واذا جاء العصر تجمعنا في بيت جدي حن وبنات عمي وعوال عمي وهنا تكمن فرحة العيد بالنسبه لنا ..نتجمع يالبنات والاولاد في الحوش ويقعدون الاولاد والبنات على الارض وكل شويه تقوم بنت وتدور والي تطلع دايرة فستانها اكبر هيه الفائزه ويصفقون لها ..اذكر مره فزت انا طلع فستاني اكثر واحد منفوش وفرحاااانه في حال سبيلي وما العب مع البناتين وكان ولد عمي ما يدور بسلسله طويييله ما يسوي بها عبا المروحه وانا ما شيه من جنبه فيها تنشب بشعري ..قال اصبري وافكرها واني اشرد وهي ناشبه وما تضيمني واطلع الى السطح وبي زعل ومتحقره ودي ابكي وماسكتها عشان ما يروني الاولاد ويضحكون عليه وعشان ما تخرب كشختي ..واني اقعد احاول اندر ذا السلسله من راسي وكودن اندرتها واني احذفها عليه من السطح قلت خذ يا ..... والله اني معلمتن بويه ..وكنا نلعب حريم نقسم الغرفه بأصابعنا نهب خط في الفرشه كانت تلتهب اصابعنا من كثر القسمه ولا علينا في ملنا ما نلعب وكل واحده تحاول يكون قسمها اكبر او تطيق تهب مسند اسمنه جلسه وتهب فراش اسمنه سريرها ونسير على بعض .. وبعد هذا العفيق كله نرجع البيت ولااااازم نرجع وقد تفقعت هيلاهباتنا من الركب ومن الاصابع وتلبدنا امي او نشبع ام نرقد.. وسلااااااااااااااامتكم ..يعني اللبد حتى في العيد هههههههههههههه 
|
|
27/09/2011, 12:22 AM
|
#2 | |
|
شاعر كبير مؤسس و عضو شرف منتديات رباع
|
ياسلام ياسلام على هيك سوالف احسب ماكان افدغ وهو صغير الا انا ههههه ( افدغ) شجره تنبت على طريق الدوادمي لاتصدقون عاد الفداغه كما قال الفيلسوف الصيني صن بن عن هي اشد انواعه البلاهه ههههه المهم مالكم بالطوايل كان ابوي الله يرحمه يعتمد على اخوي الاكبر مني بسنتين في كل شي وانا حاطني في نظره افدغ مدري ليه بس بعدين عرفت انه حاقد علي لاني كنت احب احوس البيت بلعب الكوره ام ريال اللي تنفخ على شان كذا زغودي كانت تتنفخ ههههه وكانت امي اذا ازعجتها شقتها بالسكين وطبعاً محسوبكم لازم يلعب ومتأثر بماجد عبدالله واذا مالقيت كوره جمعت شراريب ابوي ولفيتها وصلحتها كوره والعب واسير معلق مباره في نفس الوقت وعاد تخيلو واحد يمثل فريقين من 22 لاعب وهو لحاله قمة الفداغه والازعاج صح ههههه وطبعاً ابوي كان ماشاء الله عليه يقوم بكير ويتروش ويتهندم ويتعطر واذا بغى يلبس الجزمه اكرمكم الله افتقد للشراريب وقام من الصبح يلعن وانا اسمعه واسوي نفسي نايم واشوفه يفكك الكوره من الشراريب المعقده وهو يتكلم كلام مدري وش هو بس ادري انه يحش في ههههه وعلى شان كذا حقد المهم انا سرت اشتكي عند وزارة الداخليه ( امي) رحمة الله عليها واقول ليه مايرسلني اشتري زي اخوي وانا وانا كل الشغله مو حب في السوق لكن حب ان يتوفر لي ريال والا اثنين اشتري بها كوره بدل اللي شقتها ولو تدري امي ماكان توسطت ههههه المهم اشغلت الوالد انت عقد الولد انت ليه ماتعتمد عليه زي اخوه وانا مبسوط من المحاميه ههههه قال ابوي ارسلناه يجيب صامولي راح يجيب صلصله بس سمع حرف صاد وبقية الحروف مدري فين افلح بها ههههه طبعاً تجربه كانت فاشله مع الصامولي ههههه قالت عطه فرصه واظطر مجبراً اخاك لابطل ههههه ان يوافق المهم كان بكره موعد رحلتنا للباحه من الرياض يعني مسافرين والبيت فاضي من كل شي على شان السفر قال ابوي تعال وخلك رجال هاذي فلوس ورح جب لنا خبز يكون حار لا تجيب صامط يعني بارد قلت ازهلها بثقه ههههه عطاني خمسين ماكان فيه فكه طبعاً الوالد نسى يقول لي بكم اخذ خبز وانا في الطريق طبعاً كعابي امشي وافكر الحين بكم اجيب اخاف اجيب بريال والا اثنين ويقول افدغ طيب ليه عطاني خمسين المهم رحت المخبز وقلت عطنا خبز بخمسين وكان الريال يجيب اربع حبات وعليكم الحساب ههههه الخباز استغرب قال بخمسين وانا اصريت مسوي واثق ههههه ماكنت اتصور ان الخمسين بتجيب العدد الهائل حوالي 200 خبزه جمعها اليماني في عدة اكياس وانا شايلها صار منظري تقول اخطبوط ههههه واتسحبها طول الطريق وحرصت ان تكون حاره زي ما وصاني وحرقني الخبز اللي فوق راسي واللي في ايادي بس كنت متحمل على شان ابوي ينبسط من الجهد ويهب لي ريال لاني ماقصرت في شيلها وجبتها حاره زي ما قال وهذا المهم ههههه كنت اتخيل ردات فعل ابوي وامي في الطريق ان امي تقول هاااااه ما قلت لك انه ونعم وابوي يجي يسلم علي ويهب لي بخشيش ههههه واقهر اخوي الكبير بعد عنا التعب وصلت واول ماشاف الاخطبوط ملك الليل انفجع قال وش هذا بغضب قلت له حار ههههه قال اصطلخو جلدك انت بتوزع على اهل الحاره تعالي يافلانه معيني اجيب اسم امي لان المرأه وقتها باقي مادخلت في مجلس الشورى ههههه انا ماقلت لك انه افدغ انا ماقلت لك انه وانه ههههه طبعاً هي زادت الطين بله لانها تفشلت وواسطتها طلعت فاشوش ههههه فقالت قم سود الله وجهك حنا مسافرين بكره وين نوديه هيا قوم وزع على الجيران واهل الحاره والله يجعله صدقه وطبعاً بدون بخشيش تكلفت بعمل اضافي ههههه ولا تحسفت على غلطتي بقدر ماتحسفت اني يكون شريت ب 49 على شان اشتري بريال كوره واحد مصر على الفداغه ههههه وسلامتكم
|
|
[/COLOR][/SIZE]ظ…ظ„ظƒ ط§ظ„ظ„ظٹظ„ 
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
(مشاهدة الكل)
عدد الذين شاهدوا هذا الموضوع : 63 :
|
|
| , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , |
| أدوات الموضوع | إبحث في الموضوع |
| انواع عرض الموضوع | |
|
|
الإعلانات النصية ( أصدقاء الأكاديمية ) |
|||||
 |
 |
 |
 |
 |
العرض المتطور
