لهجة حميرية تجاهل المؤرخون تدوينها شفرة «الفيافية»لا يفكها إلا أهلها

الأخ صقر الجنوب الله يعطيك العافية ، وأقول لك إني طلعت هاذي المنطقة منطقة فيفا والله خفت
ما وصلت قمتها من الخوف ونفسي كانت تقول ذالحين لو تتزلزل هاذي الجبال العظيمة والله نطيح
ما حد يلقانا إلا نتفة نتفة ، والعجيب هناك منطقة جبلية يمكن أعلى من فيفا تسمى جبال القهر ،

قرى سبحان الله معلقة في الجبل ولا تدري من وين الطريق اللي يمشون منها ، لكنهم سبحان الله
أهل دين ورجال نشاما فيهم الكرم والشيمة والنخوة ولهم قصائد في الشجاعة والنخوة مثل باقي
القبائل ، ويوجد بها مناطق غريبة أحد الزملاء أراني صورة جبل مقفول داخل مغارة لكن يصب الماء
من فتحة في سقف الجبل وكان أجمل ما رأيت ،

منطقة تشعر فيها بالأمان والهدوء والسكينة وراحة النفس والبال لكن والله تخاف من الارتفاع الشاهق
للجبال لأن بعض خطوط السيارات يستحيل تمر منها سيارتين ، لازم شخص يوقف ويروح الثاني ،
مرينا وسألنا عن أحلى مطعم مندي ، ما أجمله من طبخ وما أحلاه من لحم ذكرني بلحم المندي القديم
مع قارورة بيبسي ، خلاص تتخدر على طول وترقد .

وطبعا كان عندنا سيارتين ، واحدة جيب دبل ، وهو اللي طلع أعلى منطقة ولا كملنا دخنا واحنا ندور حول
الجبل جلسنا في دوامة ، والسيارة الثانية فورد صغيرة ، الفورد الصغيرة قالت لنا اسمحوني ، طلعت شوي
وما درينا إلا وقالت هذا محلي عيت تتحرك من مكانها صخنت وارتفعت حرارتها ، وقمنا رجعنا لخوينا تحت
وأخذناه ووقف سيارته تحت اسفل الجبل ولا قدر يطلع بالفورد .

دخلنا صلينا الظهر في مسجد كان على يمين الطريق وبعدما خلصنا سألنا عن محل المندي ووصف لنا
أحد النشاما الفيافية ، ولما عرف إنا غريبين عن الديار حلف علينا إن نتغدا عنده لكن تعذرنا منه على شان خوينا اللي نشب اسفل الجبل بسيارته الفورد . المهم فيهم الكرم والشجاعة هاذي القبيلة ومشهود
لهم بهذا الشيء .

طبعا منطقة فيفا تشتهر بالمناطق الخضراء ، وخضرة عجيبة في الجبل ، والسحب والغيوم والأمطار .
وهذا ما أحببت أن أضيفه على هذا الموضوع ، ومثل ما قلت هذه اللغة العربية الحميرية من أصول
اللغة العربية التي يصعب فهمها . لكن هناك من ترجم هذه الكلمات وأظن إنها موجودة .

وتسلم صقر الجنوب .