قوّك يازينه ،،، نوره الغامدي

رَدّ السلام وقال (قوّك يازينه)=فارس وشهم وذو مكانه وغطريف
ماجاوزت نظرته عن حدّ عينه=وإلا نظرني نظرة الخاين الشَّيف
خيّال ،،، ولجام الفرس في يدينه=والزاد والباروده والرمح والسيف
يوم أقترب والخيل بيني وبينه=شمّيت في ثوبه شذا ريحة الضيف
وآشوف في عينه ملامح سنينه=اللي مضت كنّه مضيّع مواليف
رحّبت فيه ،،، وقلت (ديرة جهينه)=فيها الخبر واكد ولايحمل الزيف
قوطر وتلقى بوي تندأ يمينه=شيخ العشيره مِزْبِن الطارش الهيف
هلي وربعي ضيفهم مكرمينه=والضيف ضيف الله ومن غير تعريف
مايسألون الإسم وإلا منينه؟=من قبل يشرب عندهم دلة الكيف
قال البدو لو يسكنون المدينه=ماكان ضيّعنا صنوع المعاريف
جيت أشتكي من جارنا ولد قينه=مديون له واليوم محتاج تسليف
حطّيت من حلقي قلاده ثمينه=قلت أقض دينك ياإبن الأجواد ياحيف
وأبوي مايحتاج تنصى عرينه=إلا إذا ردّيتها قِبْلة الصيف