نايـف أبو طفـره

يقول الشاعر نايف أبو طفره :
قالو لي اقعد بالبلد قلت وشعاد*
انا البلد ماحب ضوله وسوقه
ربيع قلبي والهنا يابن فهاد*
في خايعن طرق النسايم نشوقه
لابان نجم اسهيل مافيه مقعاد*
قلبي ذعاذيع الهبايب تشوقه
اسج عن عاذل وحاسد ونقاد*
واخيط قلبن كاثراتن فتوقه
ماني من اللي يجمع المال لازاد*
اللي لجمع المال تابس اشدوقه
خطو البخيل اللي يلوبد تلوباد*
اللي طروقي ما توالم اطروقه
اليا نقلت اللي على الصيد معتاد*
الاشقر اللي زاهياته ادقوقه
في صحصحن قد جالنا فيه مطراد*
وقت المراجل كل طير ولحوقه
اليا حصل خربن اثاريه تنقاد*
وعقب القصص عمد بطاريف لوقه
هديت مسعورن مهو عنه نشاد*
لو ايتعلا الغيم صاهود فوقه
يدلي كما دلون على البير وراد*
كم خربن ازرق ذاق دم امعلوقه
يصيد لفلس طير حامد وحماد*
اليا طلع وادلج عطيته اسبوقه
طيرن ينومس لاحصل بين اعناد*
ويعد لاعدوا طيورن سبوقه
ماهو من اللي لنطلق حام مافاد*
اليا صمل خربن مصقر يعوقه
طرد الولع سهمه مطانيخ الاولاد*
اليا سمر نون تلاعج ابروقه
اليا انحدر سيله على قبر زياد*
وعلى فياض الصلب صدق حقوقه
ضافن من الباطن ليا ريق عواد*
وعلى الرفيعه مسبلاتن اشنوقه
دارن رعت فيها مغاتير الاذواد*
يومن كلن يعتزي عند نوقه
سهف البكار اللي غواربهن اسناد*
عراض الجنوب وكل وصفن تفوقه
تشوف سيله غاديله تزباد*
بامر اللذي يعلم بسر مخلوقه
اللي بسط سبعن وسبعن بلا اعماد*
ربن لعطفه كل الانفس شفوقه
يقوله اللي قزر القيض بجهاد*
وعبرات صدره بالفؤاد امخنوقه