أمين جدة وأهلها ( بالبلدي الفصيح )

بالبلدي الفصيح

فتحي حلواني

أمين جدة وأهلها
رسايل كتيير جتني من الحبايب يطلبوا مني إني أقولهم فزورة عشان يحلوها غاوييين شقى وتعب المهم أنا ح اعطيهم الفزورة والله يعينهم على حلها هيا خلو بالكم وركزوا «سبحان من سواني سبحانه، شكلي غريب اثنين الوانه، مدور او طويل ياجماله، وقلبي ابيض يامحلى بياضه، بس ياخساره الزين ما تكمل حلاته، الكتيير يبعد عني يا غباته، بعد اكلي يقولوا ياشين هرجه وجمعاته، فمن انا».
ودحين خلونا نعرج على موضوعنا حق اليوم أول شي قبل ما أدخل في هرجتي أحب أبارك لأمين جدة عادل فقيه على الثقة الملكية والتمديد واسأل الله سبحانه وتعالى انه يعينه ويوفقه على خدمة جده واهلها وتاني شي أحب أفكره بإني في تاريخ 15/3/1426 كتبت مقال اسمه (حبيبنا عادل فقيه) وشرحت فيه كل المطالب والأمنيات اللي يبغوها أهل جده من أمانة جده وارجع تاني اليوم بعد اربع سنوات أكرر نفس الكلام بلسان أهالي جدة واقول لأمينها ترى جدة العروسة صارت عجوزة وجاتها الأمراض في كل شبر فيها، شوارعها مبهدله سواء الرئيسة او جووة الاحياء مطبات وحفر اشكال والوان واللي ماسكين مشاريع السفلتة شغالين فيها ترقيع في ترقيع عالم كل شغلهم (( طبطب وليس يطلع كويس )) وياريت كمان يكون في رقابة على سيارات الرش لانه الناموس ما قصر مصمص دميان الأوادم وخاصة سكان شرق الخط السريع هدا غير القمايم اللي مرمية لانه عمال النظافة مو فاضيين يا تلاقيهم بيشحتوا عند الاشارات والا بيلملموا العلب الفاضية والكراتين وتاركين القمايم مشعتره في كل مكان وياريت كمان يكون في مراقبه على اصحاب العماير اللي بيرموا ويتركوا مخلفات عمايرهم في كل شارع وزقاق وياريت كمان تفتحوا باب منح الاراضي لاهالي جده طالما اكتشفتوا انه في 60 مليون متر مربع من الاراضي الحكومية كان متعدي عليها وياريت كمان يكون في جولات جوية شهرية يقوم بيها بعض المراقبين والمسؤولين في الامانه عشان يشوفوا كيف حال جدة من الجو ولا ننسى كمان انه لازم يكون في جولات للمراقبين بسيارتهم عشان يبلغوا أول باول على كل المخالفات والتجاوزات اللي بتصير وياريت كمان يكون عندنا حدايق عامة بمساحات كبيره في الاحياء السكنية عشان الاهالي يقدروا يقضوا أوقاتهم فيها ولا ننسى إنه لازم يكون في هادي الحدايق كل المتطلبات اللي يحتاجها البني ادم من اماكن للجلوس وألعاب للاطفال ودورات مياه للحريم والرجال ومصلى وتكون فيها اماكن مخصصة لممارسة رياضة المشي اللي كترت هادي الايام بين سكان جده وياريت كمان يكون في مراقبة على اصحاب العماير اللي بيزيدوا ادوار عمايرهم من غير احم ولا دستور واهم شي من كل الكلام ده اللي قلته ياريت نقضي على الفساد الاداري في بعض قطاعات الامانه هادي مطالب اهل جده يا امينها وانت أدرى وأبخص وعيشوا كتييير تشوفوا كتييييير

موفق بإذن الله ... لك مني أجمل تحية .

اشبك يبويا
ههه


والله لغتـهم حلوة