ديـــــــوان جنــــــــدب المـــــــالكي
البارحة وانا على اعلى المراقيب
البارحة وانا على اعلى المراقيب= ذاك الطويل اللي تروع هضابه
الشامخ اللي عسر بالحيل وتعيب= ماضن شخصاً غير شخصي رقابه
جيته وعديته عسير المناشيب=والذيب يعوي في محاني شعابه
واخذت لي ساعة وانا اجاوب الذيب= ذيباً واضنه يشتكي من صوابه
حتى تذكرت اخوتن لي واصاحيب= أهل الوفا والمرجلة والمهابة
ميدي هل الفزعات والعرف والطيب= قصدي بني عاصم شباب وشيابة
أهل القيم وأهل الشيم والتراحيب= ذباحة الباغي بيوم الحرابة
قيدومهم زيزوم واستاذ واديب= رشيد راع المرجلة والنجابة
قيدوم قوم وله في الراي تصويب= ومشيخينه من بداية شبابه
الوافي الضافي عريب المناسيب= ريف الفقارى والضعوف الغلابة
وازكى تحياتي لطب المصاويب=اهل الحسب واهل النسب واللبابة
محمد الوافي بعيد المحاضيب= اللي مشرع للمسايير بابه
وابو مهند مثله اليوم ماجيب= حراً نهار المعظلة يعتزابه
وابو سعود ابلا شكوكاً ولا ريب= الطيب خيم عند حظرة جنابه
وازكى تحياتي لشيخ اللواعيب= سعود بن حمدان ذيب الذيابة
راعي سلوم وقايماً بالمواجيب = واليا تنصاه الرفيق احتفابه
شاعر حكيم ويطرب الروح تطريب= واليا تمثل بالقصيد اعتنابه
واقول أنا يسعود يومني اغيب= ما غبت غير امن الزمان وصعابه
والغيبة اللي غبتها ودي اجيب= انكان تبغى للسوال الاجابة
امضيتها بين الحلق والمحاريب= ومرافق اهل العلم واهل الخطابة
واليوم جاي ولا عن الوضع تجنيب= غايب وتوه عايداً من غيابه
مثل الذي غرب عن الدار تغريب=ثماً رجع للموطن اللي نشابه
اذكر وفاكم دايماً يالاصاحيب=اتقول يربطني معاكم قرابة
لكن دنيانا تقص العراقيب=وتحارب المسلم كما حرب غابة
اليا اقبلت تصفى جميع المشاريب= واليا تولت كشرت بالنيابة
اتشيب اللي ما وصل فترة الشيب =وتحول القصر المشيد خرابة
حاولت اسايسها بكل الاساليب= لكنها ملعونةً ما تجابه
والوقت هذا ياطويل الاشانيب=لاشك والله معجبوني شبابه
الشاب ياتي يسحب الثوب تسحيب= ولا على جسمه مضيق ثيابه
ولا لبس له من لبوس الاجانيب= بنطال والبنطال كل الردابه
ثم قام يتمايل سوات الرعابيب= خايب ومتعلم علوم الخيابة
واللي مجنب منهج الدين تجنيب=لا و خسارة والده يوم جابه
ودك يصلب تارك الدين تصليب= ولا عليه ايقام حد الحرابة
واخص واستثني شباباً مناجيب =اهل الورع والصدق واهل الانابة
ثلة شباباً ما مشو سكة العيب= الحي منهم لا لمحته تهابه
والناس فيهم مخطي العلم ومصيب= واصابع ايدين الفتى ما تشابه
والنفس والشيطان وام العواقيب= عندي تشكل في الحقيقة عصابة
واللي نراه امن العبر والاعاجيب=شياً طبعياً ولابه وغرابة
ناساً مقاتيلاً وناساً مصاويب= في عالماً كلاً يشوف اظطرابه
واحترت اميز في وليد الانابيب= لاهوب من خندف ولا من شبابة
ومن الحتوف اقواي صارت معاطيب=واشكي من الويلات مشكي صبابة
مثل السجين اللي تعرض لتعذيب=اللي عليه امشددين الرقابة
وجروح قلبي عيت اتصح وتطيب= وازرى يعالجها خبير الطبابة
والارض من ما راح لي من ذواهيب= صارت بعيني مثل حجم الذبابة
والسر من بين الضلوع المحاديب= مكنون والمكنون محداً درابه
غير المهيمن عالم السر والغيب = هو عالماً بحوال قلبي ومابه
وانا من البشران كسابة الطيب= قوماً لنا وقت المواجيب جابة
اخصامنا يوم الملاقا مغاليب= يعني عذاب اللي براسه صلابة
واعداد مشراقاً من الشمس ومغيب= واعداد ماهلت مزون السحابة
صلو على اللي هذب الناس تهذيب = محمد اللي ناصروه الصحابة
قال الذي عنده للاشخاص تشخيص
قال الذي عنده للاشخاص تشخيص=واجرى على بعض الاوادم فحوصه
وملخصٍ حال الرجاجيل تلخيص=ومضمن اوصاف النشاما نصوصه
ما قصدي انغص على الناس تنغيص =بالقول هذا اللي كما حد خوصة
لكني ادري واعرف الذيب والنيص= وادري عن الديك الحمر هو صوصه
وانا لو املك للرجاجيل ترخيص= رخصت بالعليا لناس امخصوصة
حتى نقلص من هل الدون تقليص= والمذهب الوافي نحدد شخوصه
وان كان تحتاج العبارة لتنصيص= اخشى على الخاتم تناثر فصوصه
والعالم اللي بالمعاني مباخيص= تدري عن اعموم الكلام وخصوصه
وانصحك ياللي تجهل العوم والغيص= انصحك لا جيت البحر لا تغوصه
وان كان ما رصصت موترك ترصيص= حوص بك الموتر ثلاثين حوصة
واصبحت في دنياك من حيص في بيص= والوقت احاطت بك عصابة لصوصه
اقولها من جد ما هي تخاريص = والو ضع شايك والامور امخبوصة
اذلف وطس وورنا عرض الاكتاف
اذلف وطس وورنا عرض الاكتاف= وان ما عجبك اشرب ولا هوب صافي
لنته من اجواداً ولنته من اشراف=يعني خسيس ودايم الدوم هافي
كنت احسب انك من بعيدين الاهداف=اثرك من اصحاب القلوب الضعافي
عساك ما تسلم من اسهوم الاصداف= وعشرين حجة ما تشوف العوافي
وتطوفك الدنيا بسبعين حذاف=وياخذ عليك الفقر سعي وطوافي
بخيل ومرابي وخاين وحلاف=وعند المعاهد منت يالنذل وافي
مجلسك ما طبه مسايير واضياف=وايديك مدنت للكرام الصحافي
ومن العذاراى فيك يا لهافي اوصاف= وشعاد لو نبدي جميع الخوافي
ما تصحب الا انذال واخباث واجلاف=سود الوجيه اهل العقول الخفافي
عوج الهروج اهل الخطا والتلقاف=واقدامهم بالسوء تمشي حوافي
وانا اصدقاية يسود الخافق اشراف=قوماً مواقفهم تحل الخلافي
اهل المكارم والملاحم والانصاف=اهل العطايا بالسنين العجافي
قوماً لهم شيمة وقيمة وميقاف=اهل البرانو والسيوف الرهافي
شجعان قوم وسلمهم سلم الاسلاف=اصحاب نهجاً ما دخله اختلافي
امثال ابو حاتم ذرا الحر لا خاف= اللي مقامه بين الاجواد ضافي
وابو فهد عن منهج الحق ما صاف= اللي على الباغين سماً زعافي
ولا انت قومك خالفو كل الاعراف= مافيكم احدن قد تسمى سنافي
واللاش لو يملك ملايين والاف=مانال مدح ولا لبيته ملافي
والعام يوم الفيت نايف ونواف=طلع حقيقتهم جهاز اكتشافي
اثر الرجال اشكال والوان واصناف=واللاش لسلوم النشاما منافي
ذا قول من يلعب على كل محراف=ويجيد بدع امعوسرات القوافي
|