أنا بصراحه أشكرك أخوي صقر الجنوب على المعلومات الحلوه عن العيد
بالذات عن جده أهل الرخا والشده بجد كلام رائع
وأيام أروع من أيامنا اللي مافيها غير تمشيات البحر وبس
أيام زمان لها طعم ثاني حسب كلام أهلي
وكنت دايما أجلس مع بابا وأحب أسمع منه عن ايام زمان واعيد وغيره
وخصوصا انهم كانو من اهالي البلد بجده
بس على قوله للاسف أغلب اللي فضلوا في البلد دحين اجانب وصارت الاحتفالات هذي جدا قليله غير زمان
( زمان أول تحول ) صح في بعض من المظاهر اللي ذكرتها لكن مو زي ماكانت تتعمل زمان
وكمان كانوا الرجال اول مايطلعوا من صلاة العيد يتزاوروا مع جيرانهم بالاول ثم اهاليهم وبعدين
تجتمع العيله في البيت الكبير وكانوا ومازالوا تقريبا يعملوا طبخات معينه في العيد تعتبر من العادات هذي كمان عند اغلب اهالي البلد لكن الان يبدأوا الناس يجوا يعيدوا على بعد صلاة العصر والاغلب بعد المغرب
غير زمان كانوا يطلعوا يعيدوا من الصباح وتلاقي كل البيوت مستعده من بعد صلاة الصبح للإستقبال
مشكور عزيزي صقر الجنوب
|