يا رب ياللي بغت تغتالنا الأحزان لولاه
لو ما غشتنا كفوف الصبر وجناح السكينه

* *

للحزن مخلاب حطه في حنايا الصدر وأدماه
لليوم أنا فرحتي ثكلا وضحكاتي سجينه

* *

يا كبر حزني ويا كبر الفقيد اللي فقدناه
من صدمتي ما قدرت أستوعب إنا فاقدينه

* *
أبوي مات وقسم بالله لحظة ما دفنًاه
حسيت بأن الفضاء والكون كله دافنينه

* *
يا رب حنًا عياله وأنت تدري يوم شلناه
ماهوب جثمان ! حزن الكون وإحنا شايلينه

**
حنى قبرناه ؟ لا يا حزن حنى ما قبرناه
صدورنا قبر وإحنا بالضلوع مكفنينه

**
يا موت خذته ولكن مستحيل تموت ذكراه
حنًا زرعنا بوسط قلوبنا ذكرى سنينه

**
يا حزن ما نملك الا نقول الحمد لله
من غيره اللي تكفًل لا صبر عبده يعينه

**
يابوي حتى الرياض بغيبتك عاشت معاناه
نبض الشوارع وقف وأنوارها نامت حزينه

**
للحين يا حزن وآنا آدق رقمه يمكن القاه
يبكي جهازه على حزني وأنا أبكي من رنينه

**
كيف أقدر آعيش من دون الحبيب وكيف بنساه
اللي ترك لي بداية ضحكته وآخر حنينه

**
يا قسوة الدمع يا بطش الحزن يا حرقة الآه
يا قبح وجه الفراق اللي تطوقني يدينه

**
يا قلب من نفقده لا مر يوم وما سمعناه؟
ومن نضمًه بكل إحساس ونقبل جبينه

**
يا غبن قلبي على فقدك يابو عبدالله غبناه
وإن كان ماهوب أنا وحدي تجرًعت الغبينه

**
كيف أقنع ثيابك إن قالت لنا ما عاد شفناه
وكيف أقنع جدار بيتك لو يقول أبوك وينه

**
يا رب تكتب له الجنه وتغفر له خطاياه
ولا يجيه الحساب الا كتابه في يمينه

**
وأجبر عزانا وسامح ضعفنا مهما بكيناه
وأنزل علينا كفوف الصبر وجناح السكينه