لا تعترض أمر القدر في جدالك ،، ولا تحسب إن اللي مصيبك بيخطيك

جف القلم باللوح في ماقتضالك ،، أما سعيد الحظ ولا مشقيك

وانا اشهد إن اللي كتب لك ينالك ،، يالعبد ربك بسم حظك يناديك

كلٍ بتقدير الولي طاب فالك ،، اصبر على ما قدر الله ياتيك

ولا تلوم النفس في ما جرا لك ،، تبور غالي سلعتك بين اياديك

ويلومك اللي مادرى عن حوالك ،، ولا درى وش الدهر محدثٍ فيك

وفهم نبا ماقولك طاب فالك ،، سعيد الفتى بالحظ من غير تشكيك

إن جاد حظك باعلك واشترالك ،، فوايدة مع كل الأيام تاتيك

وان بار بك دلى يهزل حلالك ،، باردى الثمن لزمن يبيعك ويشريك

وان جاد حظك بالمجالس حكالك ،، وصدق مقالك كل من لك يحاكيك

وان بار بك دلى يكذب مقالك ،، وتصير كذبات الملى كلها فيك

وان جاد حظك للمنازل بنالك ،، بيتٍ رفيعٍ شامخ الطول يذريك

وان بار بك خلاك تنقل عيالك ،، من دار لا دار و دارٍ تجليك

وان جاد حظك كل شيٍ صفالك ،، وقرايب الخلان كلٍ يصافيك

وان بار بك بين جميع العدا لك ،، وصار المحب اعدى عدوٍ ياديك

وان جاد حظك كل شيٍ عنا لك ،، ويباشرك عند المودة ويعطيك

وان بار بك ظليت محدٍ بحالك ،، ولا بفنجالٍ من البن يسقيك

وان جاد حظك كل شيٍ زها لك ،، حلياه بارواح المجالس تزهيك

وان بار بك عزي لحالي وحالك ،، اردى ردي وهافي الجد يوذيك