((عشقي طفل))
في وسط قلبي طفل ماحوله الشيب=توه صغير السن لو شيب الراس
طفلً بري مايعرف الزور والعيب=يضحك ولا يدري عن الضيق والباس
مايعرف الغدراء ولا قصة الذيب=صادق في النيه وصادق بالاحساس
ماغربل الشيطان صدره باكاذيب= مابه غرور كليب واحقاد جساس
دمه روي من صافي الود والطيب=والحب عنوانه مع ساير الناس
له قيمة ً ماتنحسب بالحواسيب=اغلى من العمله ومن عقد الالماس
سوالفه وان كان من دون ترتيب=تعبيره ابلغ من حبر وسط قرطاس
كل ابتساماته ترحب تراحيب= ملك ولكن دون سورً وحراس
عشقي ((طفل)) يبري سموم اللواهيب=كله امل ويخلي الهم ينداس