قبل ماتبرق رعود الخير .. وأتحرّا بَرَدْها=كوّنت لذعة بروق الدمع في عيني مخيله
وأجود أنواع السحاب اللي على الصامت رَعَدْها=وأصدق أنواع الدموع اللي فيَ العين الكحيله
الله أعلم بأمّهات الريح وش توعد وَلَدْها؟=والله أعلم وش يقول الورد لأغصان ٍ تشيله؟
الغريب .. الريح توعدني ولاتخلف وَعَدْها=والوكاد .. الورد متحصّن بقوّه مستحيله
والعجيب اللي ينرفز خاطري وآمرّ وأدهى=إنّ قلبي مايتوب .. وفالهوى راعي طويله
آآآه من جرحٍ قِتَلْ فرحة عيوني في مَهَدْها=وآآآه من وردٍ مُحَال أحبّ لي وردٍ بديله
وآآآه ياسَعْد العيون اللي تشوفه .. ياسَعَدْها=وآآآه يابخْت اليدين اللي تشمّه من جديله
ياهجير أحلى القصايد .. يافهد .. يابو سَنَدْها=ياشداها .. يارباع الصعب ..ياشيخ القبيله
ياجميع أصحابي اللي أعدّ وأغلط في عَدَدْها=عفوا" : البحر الفراهيدي وش أسمّي خليله؟
ياهنوف .. وياطيوف أحبابنا .. ياللي بَعَدْها=شوّهوا وجه البخاله .. يكفي الدنيا بخيله
أكثر أبيات القصايد تحتضر قبل أعتمدها=لين أداعبها وأذكّرها بالأيام الجميله
الغرض ربط المشاعر .. كل روحٍ في جَسَدْها=والا ماينشاد برج المملكه في خنشليله
الغياب اللي سِجَدْ في وجه الأصنام وعَبَدْها=عاد مافالقلب صبر .. وعاد مافاليدّ حيله
أروقات المنتدى بالحب جرّتني بِيَدها=مثل ماطيفه لَعَب فيني وصفحاته ثقيله
والعنود الريم ذيك اللي لها قصرٍ وَحَدْها=الدلع في عينها سِرّ الجمال.. وبنت أصيله
إنتم الأبيات .. وإنتم ريحها .. وإنتم وَرَدْها=يامواليف الزيادي كل يوم وكل ليله
**