هذه من بعض مخزوننا الشعري عساها تنال إعجابكم
الشعر رمز وله معاني كثيره=والصدق كلمه والوفاء محتواها
نزعل ونقنع بالحياة اليسيره=والعافيه نعمه وربي عطاها
أهل الغنى من قبل كانت فقيره=لكن بقدرة قادر الله غناها
حضارة العالم مثال وخطيره=قامت بهمة شعبها اللي بناها
أعمارنا مهما نعمّر قصيره=وارواحنا فيها دواها وداها
وعقولنا تحوي مسائل كبيره=وقلوبنا ترجي وطوّل رجاها
أقدامنا تشكي العناء والمسيره=ومن التعب تعثر وتقصر خطاها
جور الزمن خلى الأيادي قصيره=والعين خايف لايجيها عماها
عشنا نفكّر بالعمر وش مصيره=وأيامنا راحت وحنا وراها
أحيان منا قد تضيع البصيره=والنفس تشكي والله أقوى قواها
نبحث عن اللي ودنا نستشيره=ونفوسنا عيّت تبين خفاها
لاصار مافي داخل الصدر غيره=تظلم بنا الدنيا وتظلم سماها
صدر الفتى مركز همومه وبيره=والبير ياحلوه ويامرّ ماها