* شليويح بن شلاح :

ودّي اخبِرك في قافٍ طرى لي = اسمع القاف مِن راسي وشيله
تالي البيت شيله ثُمّ رُدّه = تالي البيت شيله ثُمّ رُدّه
--
يا مفرِّح بامانه كيف حالك = كيف حالك بعدها والمعونه
جابك الله وانا لي في غايه = جابك الله وانا لي في غايه
--
* شليويح بن شلاح :

عارفٍ مكسبي مِن راس مالي = كُلّ مِكيال فالملعب نكيله
إستلامك حِسابك ثُمّ عُدّه = إستلامك حِسابك ثُمّ عُدّه
--
يا عسى الله يخلِّيك إلعيالك = انت فوق الهدف وإلاّ انت دونه
شيل حِملك وخُذ مِنّي وصايه = شيل حِملك وخُذ مِنّي وصايه
--
* مفرِّح الضّمني :

يالله اليوم يا منشي الخيالي = يا مخلِّص عميلٍ مِن عميله
كُلّ بِدٍّ يبى يطلع لِبدّه = كُلّ بِدٍّ يبى يطلع لِبدّه
--
كان حظّك مِن اللِّعب استوى لك = كُلّ عجلان ما خلّص ديونه
وضِّح القاف يا راعي الرِّوايه = وضِّح القاف يا راعي الرِّوايه
--
* مفرِّح الضّمني :

الليالي نزولٍ وإرتحالي = كُلّ سيلٍ يعبِّر مع مسيله
ومِن تحدّى لنا لازم نحدّه = ومِن تحدّى لنا لازم نحدّه
--
لا تضيّع عمامك من خوالك = مِن حرنا نطُقّه في قرونه
وانتبِه للبِدايه والنِّهايه = وانتبِه للبِدايه والنِّهايه
--
* شليويح بن شلاح :

لا تدخِّل حلالك مع حلالي = قاضي المحكمه عطني عديله
كيف تبني وبُنيانك تهِدّه = كيف تبني وبُنيانك تهِدّه
--
مُدّ يُمناك لا تعطي شِمالك = ماني ابتيس يقتاده زبونه
وانته ابخص بجودي مِن رِّدايه = وانته ابخص بجودي مِن رِّدايه
--
* شليويح بن شلاح :

كان رِدت البرى يا هُمّلالي = مِن حبى لي على البُعد إنحبي له
لا تحوبي بِسِهله مِجرِهِدّه = لا تحوبي بِسِهله مِجرِهِدّه
--
هاقيٍ لك هقاوي .. وِش طرى لك ؟ = منت سبعٍ تروّعني عيونه
انت مِن صالحلك تكسب رِضايه = انت مِن صالحلك تكسب رِضايه
--
* مفرِّح الضّمني :

ما ندوِّر مع الحافي نِعالي = والفخر عِند كسّاب النِّفيله
كُلّ راسٍ نسوّي له مخدّه = كُلّ راسٍ نسوّي له مخدّه
--
تطلُب الرِّبح واقضُب راس مالك = جِعل راسك يقدِّنه متونه
لا يغُرّك خيالك والمِرايه = لا يغُرّك خيالك والمِرايه
--
* مفرِّح الضّمني :

ما قصرناك عن درب الرِّجالي = تِكرِم الضّيف ، والدّاعي تجي له
مير جاء فيك تالي الوقت صدّه = مير جاء فيك تالي الوقت صدّه
--
وِش غدى لك ورانا ؟ وِش غدى لك ؟ = يا شليويح صون اللعب صونه
لا تومّي بثوبك والعبايه = لا تومّي بثوبك والعبايه
--
* شليويح بن شلاح :

انت تركُض على الشّوف الموالي = والمسافه على السّاري طويله
مُدّ شوفك مع الطّاروق مُدّه = مُدّ شوفك مع الطّاروق مُدّه
--
اضرِب الدّرب بالفُرجه لحالك = لين حتّى هدفنا تاصلونه
امش قُدّام لا تمشي ورايه = امش قُدّام لا تمشي ورايه
--
* شليويح بن شلاح :

خلّ عِندك على الضِّيق إحتمالي = الدّهر فيه عُوجه واتعديله
صاحِب العِرف ما ينباح سدّه = صاحِب العِرف ما ينباح سدّه
--
شِلت لك ضِلع وإلاّ الضِّلع شالك ؟ = إعرِف إنّ الجبل ما تخلِفونه
لو تُحطّون في راسه رِمايه = لو تُحطّون في راسه رِمايه
--
* مفرِّح الضّمني :

انت فكّرتني رجل إتِّكالي = ماني إبجاهلٍ يخطي دليله
واصلٍ ( كبد ) ومفرِّح ( بجِدّه ) = واصلٍ ( كبد ) ومفرِّح ( بجِدّه )
--
حلبنا الليله اطول مِن حِبالك = مِدّ حبلك ولا تنقِض مِتونه
وإن تردّى ترى عِندي وفايه = وإن تردّى ترى عِندي وفايه
--
* مفرِّح الضّمني :

يا جبل ( عوف ) مِن فوقك جِبالي = لا يجي فيك تالي الوقت ميله
ضِلع ( حوران ) ما تقدِر تضِدّه = ضِلع ( حوران ) ما تقدِر تضِدّه
--
اقضب الارض لا يدني زوالك = جاك ضِلعٍ طويلاتٍ ركونه
لا نسوّي على راسك دعايه = لا نسوّي على راسك دعايه
--