الزوار الكرام : السلام عليكم ورحمة الله وبركاته ، أقدم للجميع هذه الرائعة للشاعر : رشيد الدهام


الصاحب اللي كان مشغلني برد الأسئلة
حتى سكت وبعدها صار السكوت افضل جواب
كم قلت له : مثلي عن الوان العمر لا تسأله
أنا تساوت عندي الوان السعادة والعذاب
أنا حياتي ما لها إلا لون واحد واجهله
خليط من لون الهوا والنار والما والتراب
ما مر في عمري مراحل كل عمري مرحله
في كل عمري كنت طفل وكنت كهل وكنت شاب
آصير شايب يوم احس ان المقابيل ارمله
واحيان احس ان المقافي طفلة وارجع شباب
أنا الغريب اللي جميع الناس به متأمله
واحيان انا اللي خاطره من عزف كل الناس طاب
مالي شبيه الا السكوت اللي يثير البلبله
وما لي نقيض إلا الكلام اللي يسمونــه هبـاب
أبكـي على حالي لأني ما قدرت أبكي ولـه
واضحك على حالي لأني ما قدرت اضحك عجـاب
بين الأماني الماضية والذكريات المقبلة
امشي وخطوات الحضور بسكتي جرة غياب
أتمهل إن مرتني ايام الرخــا مستعجله
واقول لو تقبل علي بالمال يا مال الذهاب
قدرت اعيش الواقع اللي ما قدرت أتخيله
مدري أصبت العذر أو في عذري اخطيت الصواب
بس المهم اني قدرت اضرب لغيري أمثله
وشلون ما يرجي ثواب الصدق أو يخشى العقاب
ماهو غرور ولا تواضع كل ما في المسألة
يا صاحبي إني رفضت أحسب لغير الله حساب
طرد السـراب لمـن يحسبه ماء ماهـي مشكلـه
المشكـله طرد السـراب لمـن يعرف انـه سراب
................. رشيد الدهــام