يا سيدي هذي تعدا كونها وجهة نظر=هذي أسس فن التعامل قبل فن الاحترام
من عندي ارفع هامتك ماهوب لازم تعتذر=الا تعداك الملام الا تعداك الملام
ماهوب ذنبك ترفع العالم وهي تنزل حدر=ولا هوب ذنبك لا خطمت الخيل وانفك الخطام
الناس لا شافو ظلام الليل ينسون البدر=وش لك من اللي يرخصون النور لعيون الظلام
بعض الحكي لو جاك دون المستوى لا تنقهر=العاقل اللي يرتفع بالهرج عن سقط الكلام
حال البشر ما ودي آعلمك عن حال البشر=الصاحب اللي لو سبقته حط في ظهرك سهام
لا ولعت نار الجهاله لا تزودها شرر=وجعلها بالطيب والحكمه تجي برد وسلام
يا صاحبي ما ضاق صدري لو عبس وجه الدهر=والى تكدر خاطري فرشت له ريش النعام
من أصعب الطعنات للانسان طعنات الظهر=لكن هذي بالضروره تعني انه بالامام
وجدي وجود الشايب اللي شاف سمحان (ا) يهدر=باعه لناسٍ ما تفرق بين خفه والسنام
ماجيت ادور لي رشيقة عود ونحيلة خصر=ولا جيت في رجوى ابتسامه ما يخبيها اللثام
لكن جيت أسمع شعر وأكتب شعر وأقرا شعر=وراس مال السالفه عندي قصايد والسلام
لبيت دعوه من رجاجيلٍ لهم عندي قدر=والعذر لا يمكن يجملني من الناس العظام
ما قلت لك هذي تعدا كونها وجهة نظر؟=علمتنا فن التعامل بعد فن الإحترام