.=
لقيت روحي بصحراء شبه معزول=ما للفضاء والرمال أول ولا اخر
ماكني الا مريض(ن) صار مشلول=ما له مداوي ولا خل(ن) يسامر
ماغير أمد النظر بالعرض والطول=واهني الريح والطير المهاجر
أحيان أقول انتظر والامر محلول=غير الحياة في خطر وشلون أغامر
واحيان أكلم سراب البيد واقول=ودي أغادر ولكن كيف أغادر
مابين هذا وذا وطلوع ونزول=إلا وصوت(ن) ينادي يالمسافر
رديت يامرحبا ياعز مرسول=من صاحب(ن) ماتبدله المظاهر
اللي ليا قال يتبع قوله فعول=واللي ينافسه بالمدات خاسر
ماهوب من صاحبك محفول مكفول=ووقت فقرك نسي ماضي وحاضر
الدرس معقول والا غير معقول=عرفت منه المناضر والمخابر
ان ماعجبكم قلوا مجنون مهبول=هذا اللبيدي يهذري باسم شاعر
واذا عجبكم قلوا جيد ومقبول=يمكن صحاري الضما تنبت مشاعر