ليل الوعد : يعطيك العافية موضوع رائع رائع جد وعندي أحد قصص الموج أيام كانت القلوب
صافية ، يوم من الأيام كنت وأنا طفيل صغير كان عندي موعد في المستشفى وهاذيك الأيام كنا
على نياتنا ما نعرف كلمة موعد ولا مستشفى ولا كيف حتى نستأذن ، طيب والله مشكلة وش آقول
لمدير المدرسة الحين هاذي والله الورطة ، وفوقها ذيك الأيام نخاف من مدير المدرسة ، كان
عنده خيزرانه ترعب الكافر ، ولو يتاخر الطالب عن الطابور أو عن الصف دقيقة واحدة بس
دقيقة واحدة ، خلاص قل على نفسك انتهيت ، الخيزرانة بالمرصاد

ضربة واحدة ، أو ثنتين في عز البرد منها تخلي الكافر يسلم ، والله صغار إحنا ثالث ابتدائي
وثاني ، من هو النشمي في هاذاك السن يتحمل الخيزرانة ، أتحدى والله ما أحد يتحملها
وما فيه يمه ارحميني ، ولا فيه مجال للسماح والمسامحة . ويضرب بها المدير الله يرحمه
ويسكنه الجنة اللهم آمين يا حي يا قيوم ، وبعدين أصلا كان يضرب أقل شيء ثلاث ضربات
أو أربع ما يزيد عليها وما كان يجنني إلا الضرب اللي أيام الشتاء في البرد الشديد يا سلام
وبخيزرانه آحس كل عذاب الله انصب في يديه .

القصد كنا أطفال براءة في قمة البراءة ، طبعا عندي مشكلة كبيرة في كلمة موعد
للمستشفى وش آقول لمدير المدرسة ، يا ربي رباه ، يا ربي رباه وش آقول للمدير الله
يرحمه ويرحم أموات المسلمين اللهم آمين .

والله ما أعرف كلمة موعد ولا استئذان ولا عن إذنك ، بعدين تركت المدير ورحت للوكيل
لقيته في مدخل المدرسة مدري آظن كان معه خيزرانه ، وبعدين قلت له : يستاذ يستاذ ،
قال : نعم وش تبغى ؟ قلت : يستاذ بكره بمرض ، قال : كيف ؟ قلت : بكره بمرض ، قال :
كيف تمرض ؟ وفقع ضحك ضحك الين قال كان لين تهشمت ضلوعه من الضحك ، قال :
خلاص خلاص روح ادخل صفك يا شاطر ، ورحت الصف حقيه متعجب منه ليش يضحك عليه ،
ولا أدري وش السالفة هو وافق وإلا ما وافق بس شفته يضحك وبس .

اليوم الثاني رحت المستشفى ، والله لما كبرت واتذكرها ، أنا بنفسي أجلس أضحك
وحقيقة كلمة موعد وكلمة مستشفى وكلمة استأذن والله مدري وش معناها ، هذا
علمنا وسلامة الجميع وعساكم انبسطتم إن شاء الله تعالى ....... تسلم ليل الوعد