يامرحبا ماهب نودً ونسناس=على البوادي والحضر والقراوي
يامن لراسي تاج ولجنبي الباس=يامرحبا بك عد زوع الحداوي
يامرحبا يانمر ضاري وشرّاس=ياكل من اكباد الابل والكلاوي
محمد الدوسي للاشعار نبراس=ينقا بيوت الشعر عد ونقاوي
من صوبه الفتني رساله بقرطاس=والعالم الله ياعرب ويش ناوي
وش للقصص من بعد سالم وجساس=لاني لها قاري ولاني براوي
والا على الشاشات ياكم ترى اجناس=هذا صحيح وذاك ماالعقل خاوي
ماكل شىً تحت الاقدام ينداس=ولا كل من فارق هله بات طاوي
بعض المعاني مافهمنا لها ساس=واحترت فيها ماعرفت المناوي
وضّح ترى قلبي غدا فيه وسواس=وانا من اللي مايحب الملاوي
مدري ذهب في الكنز والا هو انحاس=والا هواجس من فواد الخلاوي
نور الامل يغلب على ظُلّمة الياس=والحق ماجا من هروج القهاوي
لو تشبر المدات من جيب الافلاس=ترجع تدور للدوى ياالمداوي