يقول الهمس ياراسي من احزاني غزاك الشيب=سبقت امن الحزن عمري شبابي مات في مهده
فقدت اغلى البشر عندي مثال التضحيه والطيب= ابو فيصل رحمه الله عشاني كم بذل جهده
فنى عمره عشان الكل غرس فينا الوفا ترغيب=وعاهدنا على الأخلاص ولا يومٍ خلف وعده
بليله ما بها قمرا افل نجمه بلا تطبيب=ضحية جاهلٍ ضايع صغير السن في عهده
رموه اهله في الشارع وهذي قمة التسييب=بلى خلق الله ابجهله وجاه ابليس مع جنده
وجاتني صاعقه هزت كياني كنها ترهيب=تقول الارض مهتزه وثاير بالسما رعده
ادور حولي العالم تقول الكون به تخريب=تقول اني لحالي به همومه بس منهده
احس ابغصة المخنوق ورجلي كنها بتسيب=ولا عاد احتمل اوقف ولا عاد احتمل قعده
رحلت ابدون ما اشعر وجيته والدموع اصبيب=لقيته بالكفن ملفوف وانا اصرخ من لنا بعده
دعيته ما التفت صوبي ولامن عادته ما يجيب=ومديت ايدي ابحسره تمنيته يمد يده
لكنه ما رفع جفنه ولا قدم لي الترحيب=وهو من عادته لاجيت يعانقني وانا اشده
فرحت ابكثرة العالم وهم يدعون في ترهيب=وكلٍ يمسح ادموعه الا سالت على خده
وحطيناه في قبره يارب اجعله روضة طيب=بعفوك تشمله عندك يارب الخلق واتمده
رجعيت البيت وامي لي تنادي وين راح الذيب=عجوزٍ هدها حزنه ترجاني تقل رده
وانا احظنها على صدري واقول الصبر يا ام الذيب=اصبرها وانا اتلوع وصبري واصلٍ حده
حشى لله ما نكفر وندري ان المصاب ايصيب=لكن الأدمي يبقى ضعيف او نظرته قده