صرنا ضحايا النت والنت خداع=يكسر ذراع اللي قويً ذراعه
لاني بشاري به ولاني ببياع=ولاني بتاجر به ولا لي بضاعه
نتبع جديد النت من دون مذياع=وشلون لو يعلن بصوت الاذاعه
قوقل وشات ومنتدى وضبط الاوضاع=والبالتوك لا والله الا صياعه
فيه البنات اهل الردا والتصياع=تكشف جسدها للذياب المجاعه
حب وغرام ودقتينً بالاصباع=وتصبح ضحيه بين لحظه وساعه
ماسنجر ورده وبوسة تمياع=ومن عقبها جلسه وتحلا المياعه
وتنشر فضايحها وشاع الخبر شاع=وتشيب ولدانً في سن الرضاعه
معاد اله داعي وضاع الشرف ضاع=وتصير مثل اللي ماعنده مناعه
الغرب ما والله تصفط لنا الصاع=ماتصفط الا الشين وكثر الوجاعه
وبعض المواقع طيبه و فيها انفاع=لا والله الا هذي فيها طماعه
عقلك دليلك والعقل بحدى الانواع=اما غبي ولا ملكع لكاعه
اهل العقول المستريحه بلا اوجاع=مثل الذي يجني حصاد الزراعه
واهل العقول الضايعه مالها اجراع=والله لو زادو بكثر الجراعه
صرنا ضحايا النت والنت خداع= يكسر ذراع اللي قويً ذراعه
من كلمات واداء /وادي الضما=

صح لسانك ياوادي الضما قصيده رائعه بروعة شاعرها
اسمح لي بهذا الرد المتواضع وهو مجرد اعجاب بقصيدتك

مالك وماللبحر لو ماانت شرّاع=البحر ماكلن بيقوى شراعه=
حنا نعرف البحر والموج والقاع=لاهاج موج البحر يرتج قاعه=
لايضحك الجايع على ناسن اجياع=وهو من اول مايعرف الشباعه=
لاتتجه للضيق والدرب وسّاع=المح لمسيار الدروب الوساعه=
ماكانو الاشراف عرضه للطماع=مامون واديهم ودونه قلاعه=
ماكل نجمن واضح النور سطّاع=بعض النجوم يغيب ماله طلاعه=
والناس فيهم تختلف كل الاطباع=والدين يسر ولا بيي له طواعه=
العلم واضح والخبر للعرب شاع=ماللامور الواضحه من مناعه=
القلب فيه الشوق والروح تنطاع=كلن على رايه وحسب اقتناعه=
لكل ديره ياابن الاجواد مرباع=والريح ماتثني الجبل وارتفاعه=
ونثر القصايد مابيحتاج مقراع=ياالشاعر اللي في قصيده براعه=
في منتدانا تبصر النور ولاّاع=اومره تبقا علينا مطاعه=
فيهالعلوم الطيبه اشكال وانواع=واما المخالف شب قلبه ولاعه=
المنتدى اللي يشتري المدح ماباع=في صفحة النت تلتقي له طلاعه=
تلقا المعارف حصر في منتدى رباع=وحنا ترى في منتدانا جماعه=