وش ذيـه الخرفشـه فوق راسي ، ياللـه ستـرك .

[almooj]

زمان وانا صغير نمت ورقدت في عليه غرفه في البيت طبعا عدة مرات تكرر هذا الشيء كل يوم تقريبا حتى تركت المكان اللي انام فيه اسمع فوق في سقف الغرفه خرفشه وطقطقه بين حجارة السقف واتلمح في السقف مافيه شيء ، يمكن جاني قلق بسيط لكن ما هو ذاك اللي تسمونه خوف يعني ، لا ، لكن قلق بسيط وبعدها أنام عادي مافيه مشكله لأني تعودت على هذا الصوت ، وكان عندي احساس غريب ان هناك ثعبان في سقف البيت تعرفون البيوت القديمه في الديره واللي عاش في الديره فتره يعرف هذا الشيء ، المهم فعلا اكتشفت اني انام كل يوم ومعي مرافق فوق راسي وطلع فعلا حنش ثعبان والظاهر انه كان حارس للبيت كما يقولون والله أعلم لأني ما سكت سألت كبار السن عن الموضوع وطلع حنش حقيقي ـ يا ساتر لو ذلحين الظاهر اني ما أقدر أكرر هاذي القصة وانام في مكان أو غرفه مظلمه مافيه كهرباء ولا فانوس حتى ، والحمد لله على كل حال ، وهاذي القصة حقيقيه وليست من نسج الخيال وللجميع فائق الاحترام والتقدير .

[ملك الليل999]

مرحباً ملايييييييييييييين بالموج سعدنا بتواجدك يالغالي
والشجاعه ماهي طيبه مع الثعابين ههههه

[لؤلؤة زهران]

اشكرك اخي الفاضل الموج على تواجدك العطر وعلى ماقدمت لنا
الاولين رغم صعوبة حياتهم الا انهم كانوا يتمتعون بالشجاعه والقوه والصبر
والله سبحانه وتعالى يحميهم بقدرته عز وجل من كل مكروه وجود الثعبان في سقف البيت
وعدم تعرضه لاهل البيت اكبر دليل على رحمة الله وعطفه بأهل البيت
حفظك الله اخي الفاضل ولا تبخل علينا بتواجدك ومشاركاتك الدائمه

[د.ليل الوعد]

العلم الاخضرحيا الله الموج الجنذبى يا حياك نرحب بعودتك وطلتك الغالية واشوفك جاى ومعك ثعبانashrab الله يستر يا ابو محمد haanghaangولكن حنا نستقبلك بالورد والرياحين والريحان والزعفران تحياتى لك أخوى الوفى والكريم safaqahsafaqah

[almooj]

ملك الليل : ههههه تسلم يا غالي الله يسلمك ويسعدني تجديد اللقاء بالجميع إن شاء الله تعالى والله يسعدك أخوي الغالي ، وهذا كان زمان طال عمرك لكن ذالحين صرت جبان خواف والله الواحد يخاف من الحبل حتى ، ولك وللجميع كل احترام وتقدير ومحبة خالصة لوجه الله تعالى .

أختي الغاليه لؤلؤة زهران : العفو أختي وهذا واجب علينا المشاركة
مع الجميع بكل كلمة طيبه أو ابتسامه أو أي شيء ممكن يفيد والإنسان يحاول قدر الاستطاعه ، نحاول بإذن الله تعالى التواجد
والتواصل في المنتدى ، وكلامك صحيح أختي كل شيء برحمة الله عز وجل وبإذن الله تعالى ولك فائق الاحترام والتقدير أختي .

د.ليل الوعد : الله يحيييك أهلا أهلا ارحب ويا هلا مليوووون ، وتسلم على ترحيبك الغالي وأسعدني تواجدك وانت الغالي وعزيز علينا ،
وردك يا غالي وسام لنا ، وأشكرك على الورد وووردوالريحان والزعفران ، والوفاء لاهل الوفاء واجب ، تسلم وجزاك الله خير .

[آميــر الكـونـ]

ههههههههههه بالعكس المفروض يصبح عندك
مناعة من الخوف من الثعابين بما إنك
كنت تنام وهي فوق رأسك والحمد لله على سلامتك
بس ليتني قريب منك كان أهديتك ثعبان
داخل علبة هدايا علشان أوثق العلاقة بينكم
من جديد..ههههههههههههههه
الله يوفقك أخي الموج....تحيــــــــــــــــة

[عين الجمل]

أنت صادق فيما قلت طال عمرك ،
واكرر الترحيب بك يا الموج ... مرحبا عدد ما كان في البيوت القديمة من سواري (خشب السقف )

نعم يا أخي كانت هذع الحناشة موجوده في كل البيوت والبعض منها اشتهر
وكانوا يسمونها (العُمّار) ويعتبرونها جيران فلا الحناشة تؤذي أهل البيت
والعكس صحيح ... ومن تغذيهتا بيض وفروخ الطيور التي كانت تتخذ من أسقف البيوت والرعوش أعشاش ، وكذلك بعض الحشرات والقوارض ،،

وتقبل تحيتي ...

[almooj]

أمير الكون : الله يسعدك قل آمين ، قلت لك اني جبان خواف وتبغا تهديني ثعبان في علبـه باقي معي شوية عقل شكلك تبغا تقضي عليه الظاهر ، ههههه شاكر لك مرورك على الموضوع ولو ما تمر على الموضوع يكون أحسن ههههه.

[almooj]

أخي العزيز وتاج راسي عين الجمل : تسلم يا غالي على ترحيبك وأقسم بالله العظيم أتمنى انه تعود الايام الخوالي ، كل شيء كان فيها رائع جدا من صفاء النيات وللأسف الشديد اننا انتقلنا إلى خبث الحضاره الزائفه التي كسرت واطبقت على جميع العادات والتقاليد القديمه الجميله ، لا أستطيع وصف مشاعري تجاه الماضي العريق ، فهو شيء جميل فالصداقه مثلا لم تعد مثل الصداقه الآن ، الآن بنيت الصداقه على المصلحه وعلى حب الدنيا وحب المال ، وصحيح الجميع يحب المال ويحب الدنيا إلا ما رحم الله ، لكن يجب إن لا تخرج بنا وتبعدنا عن أجمل الذكريات وتبعدنا عن عاداتنا وتقاليدنا ، وهذا انجراف حقيقي مع تيار الحضاره أصبحت أنا أو غيري يشعر بالكثير من الكذب في المعاملات مع البشر ، كما يقول الشاعر :

يعطيك من طرف اللسان حلاوة
ويروغ عنك كما يروغ الثعلب

أشكر لك تواجدك في الموضوع أخي الغالي عين الجمل وكلامك فعلا صحيح ، كانت هذه كما يسمونها في الديره عمار في البيوت ، وكانت تسكن بعضها حتى في المساجد ، تلقى مثلا الجماعه يصلون في المسيد (المسجد ) وفيه حارس ثعبان وهم عارفين انه في المسجد موجود ، ولا ينظرون فيه وشيء عادي عندهم مثل مسجد قديم كان عندنا في القريه ، والله سبحانه وتعالى هو الحافظ . ولك أيضا التحيه وكل الاحترام والتقدير لشخصكم الكريم ، والسلام عليكم .