صبّو من النور كاسه في عيون الظلام

صبّو من النور كاسه في عيون الظلام
يمكن ظلام المشاعر يفهم وينتبه

الشعر لو طارت حروفه بصدري وحام
مجبور الملم حروف الشعر وآرتّبه

أحترت في الشعر للناس الكبار العظام
أنا أكتبه وأمسحه والا أمسحه وأكتبه

مانيب شاعر ولكن فوق صدري كلام
تقصير حرفي يردّه والغلا يجذبه

دعيت في ذا المقام وصرت عالي مقام
وحفل عادل وربعه زادني مرتبه

ذولا المسرّا ويدعوني ؟ علي الحرام
لو أفقد أغلى عيالي ما تعذّرت به

هنا رجالٍ غدو للمجد ذروة سنام
فازو بكنز المراجل فضّته وذهبه

اللي معه مثل ربعك ما يهاب ويظام
الناس تعرف لظى بارودهم ولهبه

خذهم مع ميلة الايام درع وحزام
وتقهو وأضحك وميل الوقت لا تحسبه

يا عادل الشيخ يا عادل سفير السلام
ملاذ من جاء لبيته لو عليه رقبه

إسمك لوحده يسبّب للمشاعر زحام
يجعلني أختار من نهل الشعور أعذبه

أنا هنا عند عادل ما يجيني ملام
ومستعد أخسر العالم عشان أكسبه

الحمد لله ما جاء الحفل يوم الصيام
عشان ماصبّ فنجال الغلا وأشربه

وش أعتذر به لعادل لو سرقني منام
قبل أكتب إسمه وفي نون العيون أسكبه

وإن كان تبغا الكلام اللي عليه الكلام
الحين مانيب مجبور أمسحه وأكتبه

طلاق ما يستحق الحب والاحترام
الا الذي فيه من عادل صفات وشبه

عبدالله بن جلسه

طلاق ما يستحق الحب والاحترام
الا الذي فيه من عادل صفات وشبه


صح لسانك ياشاعر وابو حمود شيخ وسليل مشائخ يستحق المدح