@@ ومن (فاقد حنان)تردّ له شوقه ومضنونه

قضيت البارحه سهران وانعي قلبي المنهوب=غدا مني وليل المبتلي يمضي على هونه
أهوجس راح من ذا الصوب وإلآ راح من ذا الصوب=أنا مجنون وإلآ جملة الافكار مجنونه
ضياع القلب قلّة بخت وإلآ ماحصل مكتوب=ياليت اللي ضياعه من سبايبهم يداوونه
أنا قلبي له اسراره ولا كل القلوب قلوب=بحر ماتضحك امواجه لكلّ اللي يغوصونه
على شآنه ومن بعده تركت الزاد والمشروب=وعفت المطلب اللي تقصر الهقوات من دونه
سهرت الليل غنيت الهجيني واعذب المسحوب=رفعت الصوت باللون الجنوبي بأكثر لحونه
الاعب وحدتي وأحاول اكسب ودّها باأسلوب=وهي ترمي على صدري سيوف الغدر مسنونه
معاناتي يترجمها الوحيد اللي فقد محبوب=تحدّاه الزمن والناس حوله مايواسونه
ألا ياالله يامنشي السحاب الواحد المطلوب=تفرّد بالكمال وفي علاه الخلق يدعونه
تفرّج كربة الشاكي وتجبر خاطر المتعوب=ومن فاقد(حنان)تردّ له شوقه ومضنونه