%%% (( زمـــــــــــان يــــافــــــــن )) %%%

ياقلب .. هذي طبيعة حالنا كل يوم=
حتى الضحك والبكاء .. يبغى لها ترجمه=
( هذا بكى من فرح ) .. ( هذا إبتسم للهموم )=
غريب وضع الزمن .. نفهم ولا نفهمه=
من واقع ( الحزن دايم ) و ( الفرح مايدوم )=
قلوبنا تلتهب .. وعيوننا مُحْرِمه=
برق و رعد .. والسماء متلبّده بالغيوم=
والأرض فيها الجفاف .. وشمسنا مُظلمه=
والورد ضدّ الصَّبا .. يعشق رياح السموم=
والنجم يصرخ .. وراحة خاطري مؤلمه=
والحُب سهران وعيونه تعدّ النجوم=
جريح .. وأستنزف آخر قطرة ٍ من دمه=
وناحل الخصر ماضيّق عليه الهدوم=
الا بروز الصّدر وأردافه المُجْرِمه=
يازين حاول تخاف الله فينا .. وصوم=
اللي ترجّاك رجوى .. ليش ماترحمه؟=
لا والله الا ترى ضاعت علينا العلوم=
بالذات لو كان في تالي الشهر مَكْرَمه=
وين أمّهات العصايب ناقشات الرقوم=
زمان يافن .. وش هي فتنة العولمه=
بنت الشرف حسْب ميثاق العهد والسلوم=
دين و حياء في بساطتها ومتحشّمه=
رغم الجَمَال الإلهي ماتطيح وتقوم=
مكتوب في قلبها ( تتحجّب المسلمه )=
***