تغيبين لكنك هنا ,,,

يا يمًه عساني فدوة رجيلك الثنتين=من أول طريق الحزن لين آخر الونًه
أحبك وأهلً العين من قبل دمع العين=وأقبًل ترابك وأطلب رضاك والجنًه
أنا لو بعدت شوي يأغلا من الغالين=ماهو كره والا بغض والله لكنًه
طريق الحياه القاسيه والدوام الشين=وصدرٍ حزين وضحكته خيًبت ضنًه
تغيبين,, لكنك هنا داخلي تمشين=تقهوي دمي وأنتي لك الفضل والمنًه
وليه الحزن يقسى على صدرك المسكين=وليه السهام اللي بالأحزان منسنًه
أنا يالحبيه كل ما أشاهدك تبكين=يضيق الفضاء وأتنفس الحزن وآكنًه
يا يمه دخيلك لا تعبتي خذي سكين=وعمري حلالك لا بغيتي خذي منًه
أنا نفسي أحضن صدرك اليوم وأبكي لين=تجيني وفاتي وأنفصل بالكفن عنًه
وقبل العناق آقبًل رجيلك الثنتين=عشان أضمن إني متً لرضاك والجنًه