وترحل

هذه القصيده اخر انتاج علي السبيه الغلبان
ان مريتم مشكورين وان طنشتم مشكورين

قالت وترحل قلت وين ارحل عسى عمرك طويل=قالت ترى ماقصدي الرّحله على دار الاياب
القصد ترحل في سماء الاشواق والحب الجميل=قلت الفراق المُرّ ما في رحلته غير العذاب
قالت على فكره عرفت اسمي وقلت اهواه حيل=اسمك غلا ياحلوتي في داخل الوجدان ذاب
قالت تسلّى وانتعش ياصاحب الجسم الهزيل=وقلت جرحك منتعش حتى المداوي منه طاب
قالت تذكّر ياعلي الذكرى ترى تبري العليل=وقلت تاهت ذكرياتي بين صدّك والعتاب
اتذكّر اني سرت وحدي لا نديم ولا خليل=واحاول انسى وحدتي واقول انا توّي شباب
واتذكّر النسيان مرّه وادرك انه مستحيل=وادرك ضماء شوقي وحُبّي لكن اللقياء سراب
واسكن متاهات الزمان اللي جلا منها النزيل=والى تعذّر باب واحد ينفتح خمسين باب
يا غادره ومغادره ماللرجوع ولا بديل=الا تناهيد الذنوب اللي شكت سوط العقاب
ما كفكفت عيني من اجروح الدموع اللي تسيل=تسئل بنضره حايره والدمع ماغيره جواب
انا ادري ان الحب قاتل غير وش ذنّْب القتيل=والهجر سهمه مايحنّ ولا رحم حال المصاب
والشوق ضامي والعطاء مفقود من كف البخيل=ما غير قطرات العذاب اتهل من عين السحاب
والبدر غايب من سماه وغاب في ضِلّه سهيل=وصار ليلي سرمدي والنور يحجبه الضباب
قالت ترى حملك خفيف ولا بعد شلت الثقيل=وقلت عفوا وش بعد ماشلت من حمل الغياب
هم وجروح وشوق ومعاناه في قلبي وويل=ولا بقي الا اموت هايم واندفن تحت التراب