%%% (( ليــــه .. وش قالوا لك ؟؟؟ )) %%%

بعد مافات الآوان..اليوم جاي ومحتشر؟=
ليه وش قالوا لك المبدع معلّقها سبيل؟=
من ثمان إسنين روحي في غرامك تحتضر=
طال عمرك!!ماتشوف إنّ الزمن هذا طويل؟=
كنت مااصدق حكاية (نجم في عِزّ الظُّهر)=
لين صرت آقول في عِزّ الظُّهر هذا سهيل=
جيت قصدك تستفزّ القلب والا تعتذر؟=
عاد أنا خابرك متعوّد على رد الجميل!!=
جيت وانا شايل أغراضي على سكة سفر=
أشعث أغبر ماسح(ن) دمعته في ثوب الرحيل=
لا كحال العين يغريني ولا فتحة صدر=
أصل مادهورنيَ الا الصدر والطرف الكحيل=
وش عزاة اللي عيونه دمعها مثل المُطر=
كود تقدير الغــريب اللي طَرَقْ باب البخيل=
من عذابي كلّما ناديت دمعي والصبر=
إستجاب الدمـــع..مير الصبر قلّي مستحيل=
ليه ماقدّرتني من بادي أيام العمر؟=
يوم سيّلت المشاعر في غرامك سلسبيل=
لايغُرّك فالقصايد كثرة أبيات الشعر=
ناس ترفق بالعذوق..وناس يرمون النخيل=
صدّق إنّي لو كتبت اللي على بالـي خطر=
أجمعه في بيت واحد..واختصر بحر الخليل=
*****