يامن لقلبن غربلته الهواجيس

المشاركة الأصلية كتبت بواسطة علي السبيَه

هذه القصيده اخر انتاج علي السبيه الغلبان

يامن لقلب(ن) غربلته الهواجيس=وابراه همّه مثل بري المراسم
وعطّلت دنياه كل الاحاسيس=هيمن شتاه على جميع المواسم
لو ينتشر همّه تذوب التضاريس=حتى جبال الالب تغدي تقاسم
وطاح برج ايفل على احضان باريس=واستنكرت كل الشفاه التباسم
الوقت غادر والليالي جواسيس=والقلب يهوى لكن الحظ حاسم
يفتل خيوط المكر خلف الكواليس=ويلمّع اكوابه وفيها ترى سم
يااهل الموده ياالرجال القرانيس=كيف الرجاء ماعد للضيق ناسم
كن الخوافق والمشاعر عوانيس=غيّم عليها الوقت والجو عاسم
لا صارت اعلام السعاده مناكيس=تصبح حروف الشعر مثل الطلاسم
ماعاد تغريه العيون النواعيس=ولا عاد يغريه احتفال ومراسم

صح لسانك ملايين يابو طلال وان كانت الكلمه لاتوفي القصيده حقها من الابداع
القصيده تحمل صور شعريه راقت لي كثيراً
ولايأتي بمثل هذا الابداع الا شاعر متألق له خبره ومعلم مثلك
سجل اعجابي
مع اطيب تحيه وتقدير