الصداقه

هذه اخر قصيده لعلي السبيه الغلبان حبيت اسجلها
في هذا المنتدى وللجميع خالص التقدير والا حترام

بعض الصداقه عدامه ماعليها شفى=ماكل منهو ضحك لك تحسب انه صديق
كفى من الزيف يااصحاب الخيانه كفى=كفو بلاكم وقلبي ابيلتقي له رفيق
تضحك بوجهي وطعناتك تجي باالقفى=لاعادها الله صحبه كل ابوها نفيق
والصحبه اللي على وضح النقى توصفى=بين المطاليق تتوثّق بعهدً وثيق
ماكل صاحب مع الاصحاب قلبه صفى=كم صاحبً راح في بحر الصداقه غريق
لاعاد عرق الصداقه باالالم ينزفى=يحن صدري وتسمع له زفير وشهيق
والصاحب اللي يحملك الخطا والجفى=هذا عدوً مبين وصحبته ماتطيق
والصاحب اللي يحيك المكر لك باالخفى=كل المصايب تجي من تحت راسه لحيق
لاغاب نجم الصداقه ياعرب واختفى=مالي وماللشهاب اللي لضيه بريق
وان طال ليلي وقنديل الموده انطفى=تتوه عيني ويخفى عن نضرها الطريق
كم صاحبً به ترى قلبي فرح واحتفى=واصبح لقلبي عدو يطلق سهامه طليق
افى على الصحبه اللي تجلب الهم افى=وافى على الصاحب اللي للوفا مايليق
الورد يااهل النضر ماهو شبيه الحفى=الورد زاهي وله بين الزواهر عبيق
حتى المشاعر غدت من حزنها ترجفى=وتشتكي ماالخداع اللي سرقها سريق
ان كان مااحنا تبعنا سنة المصطفى=مصيرنا للهلاك وللجحيم الحريق