والله لوتاخذ لدمي تحاليل تلقاك بالجينات صايل وجايل

لايومي بيوم ولا ليلي بليل ..
ولا السّعد مقبل ولا الهم زايل ..

ماغير ازم همووم واحط واشيل ..
ولا راح منها هم جاله بدايل ..

تدرون يالعربان وش هي البهاذيل ..
فرقى وليف وحظ مامن صمايل ..

الوصل نعمة والمفارق غرابيل ..
ياحظ ليتك تعتدل ماتمايل ..

لا من بغيت اعدلك ترجع اتميل ..
كنك تقول اعيش واموت مايل ..

والمهرة اللي ماتعين مع الخيل ..
من دونها تقصر جميع الاصايل ..

من دونها ضاعت عقول الحلاحيل ..
وتضاربت فيها سلوم القبايل ..

ياشيب عيني يوم قفت وانا اخيل ..
دموعها وبل ٍ على الخد سايل ..

وانا اتصبر وازهم العقل والحيل ..
والقلب يشكي للضلوع النحايل ..

اصبر مثل صبر الرجال المشاكيل ..
واخبّي جروح الزمن واتحايل ..

اشب نار الشوق وارهي المعاميل ..
واريح اعصابي ببدع المثايل ..

وانا اترفع واترك القال والقيل ..
واجبر عزا قلبن على الموت آيل ..

أشب نار الشوق وارهي المعاميل ..
واريح اعصابي ببدع المثايل ..

ولا الغلا ماعاد يحتاج تفصيل ..
لانّه موريني انجوم القوايل ..

ياللي غيابك حط بالقلب تنكيل ..
ويلي على قربك ولاني بطايل ..

لا غاب صوتك ماتفيد المراسيل ..
وفر على الجوال كثر الرسايل ..

والله لو تاخذ لدمي تحاليل ..
تلقاك بالجينات صايل وجايل ..

حبك تعدى حب الاكراد لأربيل ..
إلا تعدى حب شمر لحايل ..

صبيت حبك مثل صب الفناجيل ..
وين الجليلة تشرب اشواق وايل ..

وانته تواعدني من اسهيل لسهيل ..
والشوق في قلبي مسوي عمايل ..

ليتك تبادلني الغلا والمواصيل ..
وترد لي بعض الوفا والجمايل ..

تعبت من قولة ظروف وعراقيل ..
وتعبت من قولة ياقل الوسايل ..

لا قلت انا احبك ومشتاق بالحيل ..
اتقولي جعل العوض في الموبايل ..

يعني انا وياك مثل المهابيل ..
واشباهنا فالوقت هذا قلايل ..

< كذاب من قال المحبة تساهيل> ..
راحوا ضحاياها اعيال الحمايل ..