ماتَ الجَمر وقلوب الاحباب حَيـّه
والموت لماتَت قلوب الحَبايب

ياشيشتي لو فيك ذنب وخطيـّه
معاك احسّ اني عن النّاس غايب

العام كانو لي من الأصحاب مِيـّه
وقت الرّخا لكن جفوا بالنّوايب

لاهنت يا قلبن شِكا من خَويـّه
كم راس من طعنات الأصحاب شَايب

مَرَّات اقول ان الخبل يا هَنيـّه
ولقيتهم يشكون ظلمَ القرايب

ومَرَّات أقول النَّذل لارحم حيـّه
واثر النَّذل في بعض الأوقات صايب

يانفس شيليها على السَّامريـَّه
شيلة طرب ماعاد فيها طلايب

وش لي بتنبيه القلوب العَميـّه
وحنَّا بهالدنيا دروب وركايب

أبتغزل في هذيك البنيـّه
بنتن تفـلّ القلب فَلّ الذّوايب

كم بَعثرتني واجمعتني هنيـّه
بنفس المكان اللي جمَعنا غَرايب

يا ضعفها معهم وعندي قويـّه
( منها غدا ثلثـــين قلبــي خَـرايب )

مرباعها بين العيون الشقيـّه
ومقيضها بين الجروح العَطايب

ماقول يَذبح زينها بَس هِيـّه
تَلفـتلها قلـبن عن الحــب تَايب

ماقول يذبح زينها بس هِيـّه
تَلفتلها عودن عَن الحب تايب

ولا اقول مغروره ولا هي خَليـّه
فيها دَلَع طفـلن تِبـَنـّاه شايب

جَمال نَجد وفتننتن حايليـّه
وش جمع الثنـتين فيها عَجايب

اليا اقبلت بين حسَناتن وسَيـّه
يا كثر ذنبي بين طيب وغَصايب

واليا ادبرت في دمعتينن نديـّه
قلبن معاها وقلب فالصدر ذايب

راحَ العمر مابين روحه وجَيـّه
ياكثر غَلطاتي ولانيب هَايب

شبَّ الجَمر ما دام الاشواق حَيـّه
وطفََّ العَتب والعمر ضحك ومصَايب

قصيدة ( الجمر ) للشاعر حمد السعيد ..

*** أتشرف بعرض أخر أعمالي لحضراتكم ,,

لوحة رسمتها بالألوان الزيتية ,,
أسميتها ( خَـرايب ) ,,
حجمها :90 × 60 سم

والدبابيس في اللوحة حقيقية ..

وأكيد نقدكم ورأيكم محل إهتمامي ..
أترككم مع اللوحة :

اللوحة كاملة ومعلقة على خلفية سوداء ,,
وإليكم جوانب منها :

خالص إحترامي وتقديري للجميع .. ووورد

بريشة أخوكم صالح العليان