من رسايل الواتس :


ما نجهل الدنيا ولا نعلم الغيب
مير الزمان اليا تمايل تمايل
تصيب بعض احيان واحيانا تخيب
وانت اعتبرها مثل كبوة اصايل
نمشي على درب الكرم والمواجيب
ولا شكينا من سموم القوايل
لو البشر ماهي تحب الاصاعيب
ما كان عاشت في الجزيره قبايل
الطيب ما يعني تجانبك للعيب
الطيب كيف تطول روس الطوايل
ياصاحبي من قبل فتح المكاتيب
اقرى على الدنيا عسيف المثايل
اقسى طعون الضيف طعنة معازيب
لامن غدت بين الردى والتحايل
يا صاحبي والحزن شيخ المحاديب
تحت امره تقوم وتطيح الحمايل
ترى الكرم يستر كبار العذاريب
وترى البخل يقطع يدين الفضايل
من شفت ناب الذيب في جيفة الذيب
آمنت بإن اهل المروة قلايل
لا صرت ما تضمن قلوب الاصاحيب
جنب قبل تلفي عليك الفشايل
احدن اذا مديت له طيبك يغيب
ما تملي عيونه كبار الفعايل
واحدن يموت ان كان سويت به طيب
يخاف ما يقدر يرد الجمايل