دخلي قالب الرز بالبشاميل في الفرن لحد ما وشه يحمر

النهارده على "سفرة دايمة" هنقدّم لكم الرز بشكل جديد، وهو قالب الرز بالكبدة والبشاميل، وده طبق متكامل ومغذّي جدا، وشكل مختلف لتقديم الأرز.

أرز بالبشاميل والكبدة
المقادير:
2 كوب أرز
¼ كيلو كبدة فراخ
بصلة صغيرة مفرومة
2 ثمرة فلفل ألوان مقطّع شرائح
كوب زيتون مقطّع شرائح
4 ملعقة كبيرة زبدة
2 فص ثوم مفروم
2 ½ كوب ميه
مكعب مرقة دجاج
½ ملعقة صغيرة قرفة
½ ملعقة صغيرة بهارات
½ ملعقة صغيرة جوزة الطيب
كوب جبنة رومي مبشورة
ملح وفلفل

مقادير البشاميل:
3 ملعقة كبيرة دقيق
2 ملعقة كبيرة زبدة
½ كيلو لبن

الطريقة:
1- شوّحي البصل والثوم في الزيت لمدة دقيقتين، وبعدين قطّعي الكبدة قطع صغيرة وحطّيها مع البصل.

2- سيبي الكبدة على نار عالية لحد ما تغلي وتنزل ميتها، وبعدين تشربها تاني، وقللي الحرارة وغطّي الحلة، وسيبيها تستوي على نار هادية.

3- قبل ما الكبدة تستوي ضيفيه عليها الفلفل، وبعدين ضيفي الزيتون وتبّليها بالملح والفلفل والبهارات والقرفة وجوزة الطيب.

4- في الوقت ده اسلقي الأرز؛ بإنك تحطّي ميه على النار لحد ما تغلي، وبعدين حطي فيها ملح، وملعقتين زبدة، ومكعب مرقة دجاج، وبعدين حطي الرز بعد ما تغسليه كويس.

5- سيبي الرز على نار عالية لحد ما يتشرب الميه، وبعدين هدّي الحرارة أوي وغطي الحلة، وسيبيها لحد ما الرز يستوي.

6- في الوقت ده اعملي البشاميل؛ وده بإنك تخلطي الدقيق مع الزبدة وتقلّبيهم على النار لحد ما الدقيق يبقى لونه دهبي، وبعدين صبّي عليه اللبن وقلّبيه بسرعة علشان الدقيق مايعملش كتل، والصوص يبقى ناعم، وتبّليه بالملح والفلفل ومكعب مرقة دجاج، ولو حسّيتي إن الصوص بقى تقيل ممكن تزوّديه شوربة أو لبن لحد ما يوصل للسُّمك اللي إنتي عايزاه.

7- بعد كده رصي كل المكونات في القالب: حطي طبقة أرز في الأول، وبعدين حطي الكبدة، وبعدين طبقة تانية من الأرز، وبعدين حطي البشاميل في الآخر، ورشي عليه الجبنة ودخّليه الفرن لمدة 20 دقيقة أو لحد ما وشه يحمر، وقدّميه بالهنا والشفا.