ياصاحبي دايم لك الروح تشتاق = انت الوحيد اللي لك الحب كله
لك كامل الاشواق يازين تنساق = سوق السحايب والغيوم المهلَه
ياابوخدودً كنَها نوض برَاق = تحت الرموش اللي عليها مضلَه
وابوجعودً كنَها الموج صفَاق = يشبه غزير الموج لمَا يفلِه
واللحظ لقلوب المحبين سرَاق = وكل من شافه ترك فيه علَه
مزقت قلبي مثل تمزيق الاوراق = ارحم تراني في غرامك مولَه
الهجر بعد الوصل وشلون ينطاق = والوصل بعد الهجر ما احدً يملَه
رادار حبك لي على طول لحَاق = والجيش حاصر خاطري واستحله
ياصاحبي مادمت للهجر سبَاق = انا معك قلبي غرامه يتلَه
مادام في شرع الهوى وصل وافراق = صلَيت في حبك على كل ملَه