جده عروس البحر مدري عذابه=
في ثوبها قصة دموع الحواري
... بالامس مبتله بقطر السحابه=
لين اختلط لون المطر بالمجاري
واليوم محروقة جسد .والغرابه!!=
مازال ثوب الحزن،، منظر حضاري
تلحفت ثوب الألم والكآبه=
تصرخ ( عسى من هو يرد اعتباري)
ياصاحبي هل للمسائل اجابه=
لامات طفلة،، وش يفيد اعتذاري
تموت شمعه،، لاجل عين الغلابه=
وتطيح دمعة،، من عيون العذاري
في مدرسه صارت حطام وخرابه=
ذكرى،، جسدها من عنا الظلم عاري
غدير نادت ريم !! باقي مصابه!؛=
طفله،، يحاصرها اللهيب الحراري
ياأستاذتي!! يامعلمتني الكتابه!!=
أشوف باب الموت ،، مخرج طواري
وجه الحبيبه ،،من يعوض غيابه=
ومن هو يعوض حرقتي وانكساري
ماتت ويحضنها الوطن في ترابه=
وغابت وسالت بالدموع الحواري
قولوا لمن يفهم لحضرة جنابه=
ترى المدارس سيئة وانت داري
والوضع مزري والمباني معابه=
واسوارها تصرخ : ( كرهت انتظاري)
بين المطر والنار وجه التشابه=
والنور ظلمه والصعود انحداري
اخر ضحايا موطني لاغرابه=
اطفال يحضنها اللهيب الحراري
واكبر مثل للتضحية والمهابة=
غدير كتوعه وريم النهاري