هلا يامن تربّع في وسط قلبي وهلآ به=جرى حبّه كما مجرى دمي داخل شرايينه
الى منّه حضر في كبرياه تزيده مهابه=ويازينه حضور الصاحب الغالي ويازينه
أحبّه واعشقه واموت في طاريه واحيا به=وهو بلسم جروح الجسم الى عجزوا مداوينه
وجوده مطلبي ماهوب الى ضقت اتسلّى به=خفوقي مايبي غيري لو الخفرات يغرينه
ملكني وابرك الساعات ماهي غصب ونهابه=أنا راضي عسى عمري فداه وطالت سنينه
فتح باب الامل يوم الزمن ضدي قفل بابه=وكنّي من مواليد أمس طفل اسعد محبّينه
غريب اطباع واضح فرق يوم الناس تتشابه=بغى الشّعار وصفه لكن اعجزهم هدب عينه
جدايل غيمة(ن)سودا تضمّ طويق وهضابه=ونظراته بروق اللي تصيبه مات في حينه
مزج بين الرعود وكل نسمه داخل ثيابه=الا منّه دفي ذابت جبال الثلج بيدينه
أنا استغفرك يالله ياللذي ماخاب طلآبه=لو إنه غير مسلم كان غيّرني على دينه