يالله ياللي له توجّهت ورفعت الكفوف=جل شأنه خالق الكون عالي في سماه
الوحيد اللي تعالى توحّده الصفوف=الطمع في رحمته والضماير في رجاه
ياوجودي وجد من لافته حدب السيوف=ضربتن في وسط وجهه وضربه في قفاه
وجد من صارت معاناته بوسط الرفوف=لا حدن يقرا كلامه ولا يسمع نداه
وجد من خانه زمانه وحدّته الظروف=والقريب أصبح يجرّعه سمّه في دواه
وجد من يحلف لخلق الله اقسام وحلوف=إن صدق قالوا كذب وإن كذب قالوا جزاه
نعلبوا حظّ(ن)زرع في حشى راعيه خوف=وأحرمه حتى من أبسط حقوقه وابتلاه
إن جفاني صاحب(ن)كنت له كلّي عطوف=كان يهواني ولا كان له عنّي غناه
ماعلى باقي الخلايق ملام ولا حسوف=إن قطع وصله هوى البال والماضي نساه
والموارد لاصبحت بعد مجراها نشوف=غار ينبوع المحبّين وتعكّر صفاه
إن ظمينا ماروتنا تعاليل الرشوف=وإن سكتنا ماوصل كلّ واحد مبتغاه
إن عجزنا لا نحطّ النقط فوق الحروف=موتنا أرحم من حيات(ن)تولآها الطغاه
المشاعر ذبحها لاغدى ذبحة خروف=ضاعت اصوات الرعيه وسط صمت الرعاه
والله إن الحال يبغى مراجعة الكشوف=وإن ليل الهم مايتعب إلآ من سراه
تم قولي والشفاعه لمن فوق الوصوف=أحمد الهادي سلامي لشخصه والصلاه