هلا بك في حنايا صدر خلّك يالغلا حييت=تحية شوق ومحبه لها مصدر وعنواني
ولا فيها مصالح دنويه لا ورب البيت=على وضح النقا ماينتقدها فلان وفلاني
تعلّت عن مدار أهل الفضول أقديت وإلآ أخطيت=لها عندي حساب ولا تقال لكل من جاني
يترجمها لساني حسب مفهومي ولا زلّيت=ولو يعجز كتبت احروفها في صدر ديواني
يزور العين طيفك يالغضي لاأصبحت وإلآ أمسيت=ويسبح بك خيالي وانت راعي كل وجداني
ترى غيرك يجي ويروح ماشوفه ولا أهتميت=ولا من مد كفه لي صديقي يوم حيّاني
أسألك باللذي سوّاك ماتدري ولا حسّيت=ولا أنتابك شعور إني سجينك وانت سجّاني
معك صبري طويل أبشّرك ماأقنع ولا ملّيت=متى ماحنّ قلبك قام حظّي يوم تنصاني
مكاني فوق نجم سهيل إذا كانت بقرب وفيت=ولك تلقاني اقرب من هدب عينك والاجفاني
تهلّي بي وتضحك لي فيافي نجد إذا حلّيت=وتحزن من فراقي شمّخ الديره وتنعاني
ابعلّمك انا مثل القبس مجنون إلآ قبّيت=وأنا برد وسلام إن ماضهر في الجو نغصاني
يضايقني وجود اللأش في هندام راعي الصيت=ويعجبني عزيز النفس ع القاصين والدّاني
أبختم والعذر ياصاحبي لولاك ماغنّيت=ولا في خاطري باصف لي بيتن مع الثاني
هلا بك يابعد كل الخلايق في مكانك جيت=عن اذنك يحتفي بك خافقي ويودّع أحزاني