سيداتي سادتي
لكم لطهركم لنقدكم كل المساحات
البعد الأخر لهذه الخربشات
موجع حد الإعياء

من ثبت التهمة بختم مزور= احيان ينفيها و هي محسومه
اللي يبي مثل البشر يتطور=لاتقل في نصحه و تكثر لومه
الوضع ما هو مثل ما تتصور=خله يروح و يخذله مفهومه
يا خوفي اتزل القدم و اتهور=و اطيح طيحة ما وراها قومه
عيني و هي من جوعها تتضور=للقمة ما هيب لي مقسومه
لو كلت منها و ابتديت أتعور=كثير يدرون أنها مسمومه
فهمتها يا خويه ؟ الله ينور=الأصدقاء أحيان ألد اخصومه
أطرب ل صوت البندق اللي ثور=اعطيته اعلومي و أخذت اعلومه
و اخلاصي اللي في ذراعي مور=وثقت و احبال الثقة معدومه
الصيد للقناص يا ما دور=ما يدري ان اليوم ما هو يومه
من يزرع الصحرا و هو ما سور=ما شم ريحانه و لا يشمومه
احرقت أعصابي و دمي فور=و الجسم وده يطلع امن اهدومه
بعض الضماير لو بغيت اتصور=وش لون بلقاها و هي معدومه
كلام عن مقصده ما يتحور=السالم اللي سالمً من قومه
نسيت من وده معي يتصور=وتزين الصوره غلاف البومه