صدفة تذكرت الشفاة ولا تذكرت الكلام = باقي صور لاحداث مرت بس مرت صامتة

صدفة لقيتك في عيوني جيت من وسط الزحام = ماقلت باسأل فكرها واعرف وشنهي حالته

ياصاحبي دامك شرعت البعد وانهيت السلام = وش له تمر بخاطري وتجي وتقلق راحته

إن جيت انا باشتاق وان ماجيت شوقي فـ. احتدام = واغمض عيوني أسى والهم يرفع رايته

واكتبك في صدري بعيد ابعد من حدود الحرام =واقراك في دمـّي تعانق آخرة وبدايته

إيه اعترف لازلت في قلبي أسير بلا تهام =لازلت سلوة خاطري لازلت وحدك غايته

إيه أاعترف لازلت اسامر ريحة انفاس الغرام = لازلت اصوغك في قوافي الشعر واشبع حاجته

لازال صوتي يسترق عنك السوالف فـ.الظلام = ويعيد فيك امجاد سلطانه ونصر ولايته

يحكيك لاوراقي لجدراني لعطري للزمام = يوصف ملامح صورتك يبكي سوالف خانته

ياصاحبي ماعاد بعدك بارتجي غير السلام = وانت سلامي وابتسامي والفرح ومرايته

لكن طلبتك لا تمر بخاطري مرّ الكرام = دامي بديتك بالغلا وانتَ ختمت روايته

ياصاحبي لو هو تغلي أو تخيرت الخصام = لاجيك انا وارضي غرور الضيق وانحر ساعته

لكن مدام اخترت شرع البعد وانهيت السلام = وش له تمر بخاطري وتجي وتقلق راحته