الحمد لله ان قلبي ماعليه من البنات= وأجمل جميله ماتحرك فيه شعره ساكنه
في القاهره كانت لنا وقفه ولمينا الشتات=ماهي غريبه فان مصر أرض الهنا واماكنه
الجو صاخب وابتدى ليل الرعيه والرعاة=كل الأمور المستحيله فيه صارت ممكنه
الخير واجد نحمد الله والدلات مبهرات=والظاهر ان الهيل خلا روسهم متوازنه
جتني جميلتهم تغنج قلت يالله الثبات=شفت ابتسامتها على كل القلوب مهيمنه
سويت نفسي بأشعل الجمره لروس معسلات=قالت ترى ماللجمر داعي يديني ساخنه
ناضرت فيها قلت طيب التمر من طيب النواة=وانا أعرفك من داخلك فتنه وبرا فاتنه
ترى النظر بين الخلايق شي عادي خذ وهات=لكن لك نظره حياويه ونظره ماجنه
قالت تعال الليل رومنسي موسيقى وأغنيات=بكره تروح ووش يصبرنا على بعدك سنه
قلت الطرب ماهوب في شعبان ياريم الفلاة=ماطربني الا عرضة أجدادي وطرق الهيجنه
الليل عندي لاهتزاز القلب من لون السكات=والليل عندك لاهتزاز الخصر فن ودندنه
ما مر عمري من سواد الرمش لا حمر الشفاة=قلبي تعلم كيف يوفي لو عيوني خاينه
رغم ان قلبي من عرفته ماعليه من البنات=ما جا الصباح الا وماعد فيه شعره ساكنه